Сар те поможина околенге со иси лен емоционално насвалипе

Со значинела акава

Ако несаво амаро амал боринела пе несаве емоционално проблемеа, локхесте шај те мислина аменге кај нашти те поможина ле. Ама шај те сикава кај грижинаја амен леске адалеа со ка поможина ле те боринел пе пле емоционално проблемеа. Сар?

Сар шај акава те поможинел аменге

Ов спремно сигате те шуне (ЈАКОВ 1:19).

Најшукар начин сар те поможине тле амале тано те шуне ле кеда ов мангела те керел лафи. Ма мислин кај ваљани те одговорине ко са со ка вакерел. Сикав леске кај шунеа ле внимателно хем кај грижинеа тут леске. Пробин те хаљове сар осетинела пе хем ма осудин ле. Ма бистре кај шај те вакерел нешто со на мислинела хем башо со покасно ка овел леске пхаро (Јов 6:2, 3).

„Утешинен околен сој разочариме“(1. СОЛУЊАНИТЕ 5:14).

Шај тло амал иси ле анксиозност или осетинела пе кај на врединела. Чак ако на џанеа со те вакере шај те охрабрине хем те утешине ле адалеа со ка сикаве кај грижинеа тут леске.

„О чачутно амал сикавела мангипе ко секова време“(ИЗРЕКИ 17:17).

Нудин леске практично помош. Наместо те мислине кај џанеа сар те поможине ле, пуч ле со шај те кере леске. Ако тле амалеске пхаро те вакерел сој тано леске потребно, тегани керен нешто заедно, сар на пример икљовен те пхирен заедно. Или палем, поможин ле те пазаринел, те чистинел или ко нешто јавер (Галатите 6:2).

„Овен стрплива“(1. СОЛУЊАНИТЕ 5:14).

Шај тло амал нане секогаш те мангел те керел лафи. Уверин ле кај спремно ка шуне ле кеда ка мангел те керел лафи. Адалеске сој насвало тло амал шај ка вакерел или ка керел нешто со ка поврединел тут. Шај адава со планиринѓен те керен заедно ка откажинел или нане те овел расположимо. Ов стрпливо хем сикав кај хаљовеа ле џикоте поможинеа леске (Изреки 18:24).

Тли помош шај бут те значинел тле амалеске

„Трудинава ман те овав асавки амалин колаја со шај ој секогаш те керел лафи. Иако на џанава сар те решинав лакоро проблеми, секогаш трудинава ман те шунав ла со иси те вакерел манге. Понекогаш ваљани лаке некој со ка шунел ла, а пало адава ој осетинела пе пошукар“ (Фера,a колакири амалин на хала маро иси ла анксиозност хем клиничко депресија).

„Јекх мли амалин тани бут љубезно хем позитивно. Ој канинѓа ман ко јекх бут шужо хајбе. Ој сине добором љубезно хем керѓа те осетинав ман бут шукар, а аѓаар сине манге полокхо те вакерав мле чувствија. Адава бут охрабринѓа ман!“ (Ха јун, кола со иси ла клиничко депресија).

„Бут важно тано те ове стрпливо. Кеда ми ромни ка керел нешто со вознемиринела ман, сетинава ман кај адава керела адалеске сој тани насвали хем кај ој нане асавки личност. Адава поможинела ман те на хољанав лаке хем те овав лаја по обѕирно“ (Џејкоб, колескере ромња иси ла клиничко депресија).

„Ми ромни бут поможинела ман хем утешинела ман. Кеда астарела ман и анксиозност, ој никогаш на чхивела ман те керав нешто со на керела пе манге. Понекогаш адава значинела кај ој да нане те керел адава со мангела. Ој тани посебно манге соске тани бут дарежливо хем нане себично“ (Енрико, коле со иси ле анксиозност).