О едноставно живото анела бахталипе

О ДАНИЕЛ ХЕМ И МИРЈАМ леле пе септември 2000 берш хем сине лен удобно живото ки Барселона (Шпанија). О Даниел вакерела: „Сине амен шукар платими бути хем хаја сине ко шукар ресторантија, џаја сине ко одморија хем кинаја сине квалитетна шеја. Исто аѓаар, џаја сине редовно ки служба“. Ама, тегани случинѓа пе нешто со менинѓа ленгоро живото.

Ко конгрес со сине ко 2006 берш, о Даниел шунѓа говор коте со сине о пучибе: „Кераја ли са со шај те поможина адаленге со џана ко друмо со ингарела ко мерибе те шај те овен ко друмо со ингарела ко вечно живото?“ (Изр. 24:11). Ко говор сине објаснимо кај иси амен одговорност те проповедина и библиско порака соске о живото е манушенгоро зависинела таро адава (Дела 20:26, 27). О Даниел вакерела: „Тегани осетинѓум ма сар те пхене о Јехова вакерела манге адава“. Ко говор исто аѓаар сине вакердо кај сием побахтале кеда кераја повише ки служба башо Јехова. О Даниел шај сине адава те дикхел тари Мирјам, која со служинела сине сар пионери хем сине бут бахтали.

Акава говор бут влијајнѓа упро Даниел, адалеске одлучинѓа те керел баре промене ко пло живото. Почминѓа те керел похари саатија бути, уло пионери, хем размислинела сине кобор ка овен бахтале ов хем и Мирјам ако џана те служинен ко тхан коте со иси побари потреба.

ПРВО СИНЕ АМЕНГЕ ПХАРО, А ПАЛО АДАВА ДОБИНЃЕМ ШУКАР ХАБЕРИ

Мај 2007 берш, о Даниел хем и Мирјам мукхле и бути хем селинѓе пе ки Панама, тхан кова со англедер посетинѓе ле. Ленгоро подрачје сине некобор островија ко архипелаг Бокас дел Торо ко Карипско море. Повише таро мануша со живинена адари тане таро племе Нгабе. О Даниел хем и Мирјам мислинѓе кај адале паренцар со сине лен штедиме, шај те ачхон ки Панама отприлика офто масек.

Те шај те ресен џи ко островија користинена сине чамцо, а кеда ресена сине ко островија користинена сине точако. Панда сетинена пе кеда о прво пути возинѓе 30 километрија точакоја ко уче брегија ко татипе. О Даниел добором бут сине уморно со харичкаске ка перел сине ко несвест. О мануша таро племе Нгабе каске со проповединѓе сине бут гостопримлива, посебно кеда о Даниел хем и Мирјам сиклиле несаве лафија ки ленгири чхиб. Башо кратко време сине лен 23 библиска курсија.

Со случинѓа пе кеда трошинѓе о паре со сине лен? О Даниел вакерела: „Асвенцар ко јакхја почминѓем те размислина кај ваљани те ирана амен ки Шпанија. Сине аменге пхаро те мукха е манушен со проучинаја сине ленцар“. Ама пало јекх масек, ола добинѓе шукар хабери. И Мирјам вакерела: „Сием сине викиме те служина сар специјална пионерија. Кобор сием сине бахтале со шај сине те ачхова ки амари доделба!“

НЕШТО СО КЕРЕЛА ЛЕН НАЈБАХТАЛЕ

Адалеске со сине несаве промене ки организација, о Даниел хем и Мирјам мора сине те чхинавен е службаја сар специјална пионерија ко 2015 берш. Со керѓе пало адава? Сине лен доверба ко лафија таро Псалм 37:5: „Са тло пхарипе фрде е Јеховаске, нека овел тут доверба ки лесте хем ов ка поможинел тут“. Аракхле бути колаја со шај те грижинен пе башо пле потребе сар општа пионерија хем авдиве ола служинена ко јекх собрание ко Верагвас (Панама).

О Даниел вакерела: „Англедер те џа аменге тари Шпанија, на сием сине сигурна дали шај те живина едноставно живото. Авдиве живинаја аѓаар хем ништо на фалинела аменге“. Со керела лен најбахтале? Ола вакерена: „Најбахтале керела амен адава со шај те поможина е кротка манушенге те сикљовен башо Јехова!“