Сар финансиринела пе адава со керена е Јеховаскере сведокија?

Амаре активностија првенствено финансиринена пе таро доброволна прилогија со дена лен е Јеховаскере сведокија.a Ко тхана коте со икераја амаре состанокија иси кутие башо прилогија. Јавера начинија сар шај те ден пе доброволна прилогија шај те аракхе ки амари интернет-страница, ко дело Донацие. Секој шај те биринел дали мангела те дел прилогија башо амаро проповедибе ко цело свето, башо потребе е собраниенгере, или башо солдуј буќа.

Е Јеховаскере сведокија на дена десеток хем лендар на очекујнела пе те ден одредено сума паре или одредено проценти тари пли заработка (2. Коринќаните 9:7). Ко амаре состанокија никогаш на кхедаја прилогија хем о влези тано бесплатно. Исто аѓаар, на платинаја о говорија башо крстибе, парујбе, венчавка хем јавера религиозна службе. На кхедаја паре преку хуманитарна забаве хем свечена вечере, наградна игре, карневалија или слична настанија, а исто аѓаар на родаја е манушендар те ден паре. О прилогија со дена пе тане анонимна (Матеј 6:2-4). Ко амаре интернет-странице хем публикацие нане рекламе колендар со лаја паре.

Секова собрание е Јеховаскере сведоконгоро секова масек дела финансиско извештај ко пле состанокија, коленде со шај секој те авел. О сметководство таро секова собрание тано редовно проверимо те шај те ова сигурна кај о доброволна прилогија тане исправно користиме (2. Коринќаните 8:20, 21).

Сар шај те ден пе доброволна прилогија

• Кутие башо прилогија: Шај те чхиве тло прилог ко кутие башо доброволна прилогија со аракхљона ко амаре дворане, конгресна сале или ко јавера тхана коте со икерена пе амаре состанокија.

• Прилогија преку интернет: Ко бут пхувја, преку и страница Донацие, шај те ден пе прилогија дебитно хем кредитно картичкаја, преку електронско банкарство хем ко јавера електронска начинија.b Преку акала начинија, несаве Сведокија одрединена сума паре која со секова масек автоматско префрлинела пе ки сметка тари организација (1. Коринќаните 16:2).

  

• Јавера начинија те дел пе: Те шај те де прилогија ко јавера начинија шај ка ваљани англедер те кере несаве планија башо адава хем/или те роде совет таро правно советнико. Аѓаар шај те користине ако ки тли пхув иси закони те на платине данок или те платине похари данок. Окола со мангена те ден прилог ко несаве таро акала начинија акана, или пало пло мерибе, шај те контактиринен е подружницаја таро ленгоро тхан те шај те добинен о потребна информацие хем те дознајнен сар шај те ден прилогија преку:

  • банковна сметке

  • животно или пензиско осигурување

  • имот

  • хартие тари вредност хем обврзнице

  • тестаментија

Башо повише информацие сар шај те де доброволна прилогија, мечин ко линко Донацие.