Mihej

4 Ko poslednja dive, i gora ki koja tano e Jehovaso ćher ka ovel utvrdimi upreder o gorska vrhija, ka vazdel pe upreder o bregija hem koro late ka aven o narodija. 2 But narodija ka đan hem ka vaćeren: „Aven! Hajde te đa ki e Jehovasi gora hem ko ćher ando e Jakoveso Devel! Ov ka sikavi amen ando pe drumija hem ka đa lese stazencar.“ Sose o zakon ka avel ando Sion hem e Jehovaso lafi kotar o Jerusalim. 3 Ov ka sudini maškaro but narodija hem ka ispravini odova so valjani maškaro but moćna narodija kola tane hem paše hem dur. Ando pe mačija on ka ćeren raonikija hem ando pe kopljija ka ćeren srpija. O narodo upro narodo više na ka vazdel mač hem više na ka sikljon te maren pe. 4 Svako ka bešel tali pi drakh hem tali pi smokva hem niko na ka daravi len, sose odova phenđa o Jehova, o Komandanti upro sa o vojske. 5 Sose sa o narodija ka služinen pe devlese, a amen ka služina e Jehovase, amare Devlese, ki celo večnost.