Jovan
3 Maškaro fariseija hine jekh manuš kova vićinđa pe Nikodim, jekh ando judejska poglavarija. 2 Ov raćate alo ko Isus hem phenđa lese: „Rabi, đanaja so tu hijan o učitelj kas o Devel bićhalđa, sose niko našti te ćerel čudija kola tu ćereja ako o Devel nane oleja.“ 3 O Isus ko odova phenđa lese: „Ćaće phenava tuće, ako neko palem na bijanđola, našti te khuvel ko Devleso Kraljevstvo.“ 4 O Nikodim pućlja le: „Sar šaj jekh baro manuš palem te bijanđol? Niko našti te irini pe ko pe dajako vođi hem palem te bijanđol.“ 5 O Isus phenđa lese: „Ćaće phenava tuće, ako neko na bijanđola ando pani hem ando duho, našti te khuvel ko Devleso Kraljevstvo. 6 Okova soj tano bijando ando telo, ov tano manušikano ćhavo, a okova soj tano bijando ando Devleso duho, ov tano e Devleso ćhavo. 7 Ma čudin tut so phenđum tuće: ’Mora palem te bijanđon.‘ 8 I bavlal phudela kuri mangela hem iako šuneja la, na đaneja kotar avela hem kaj đala. Ađahar tano hem svakoneja kova tano bijando ando Devleso duh.“ 9 Tegani o Nikodim pućlja le: „Sar šaj odova te ovel?“ 10 O Isus phenđa lese: „Tu hijan učitelj ko Izrael, a na đaneja odova? 11 Ćaće phenava tuće, amen vaćeraja okova so đanaja hem svedočinaja ando okova so dikhljam, ama tumen na prihvatinena amaro svedočanstvo. 12 Ako na verujinena ked vaćerava tumenđe ando buća soj tane ki phuv, tegani sar ka verujinen ako vaćerava tumenđe ando buća soj tane ko nebo? 13 Nijekh na ukljilo ko nebo osim okova so huljilo kotar nebo, o manušikano Ćhavo. 14 Sar so o Mojsije ki pustinja vazdinđa e sape ko stubo, ađahar hem o manušikano Ćhavo valjani te ovel vazdimo, 15 te šaj svako ko verujini upro leste te ovel le večno životi. 16 Sose o Devel odobor manglja o sveto so dinđa pe jedinobijande Ćhave, te na ovel uništimo nijekh kova mothovi vera ano leste, nego te ovel le večno životi. 17 Sose o Devel na bićhalđa pe Ćhave ko sveto te osudini le, nego te šaj o sveto te spasini pe prekalo leste. 18 Ko verujini ano leste, na ka ovel osudimo. Ko na verujini, već tano osudimo, sose na verujinđa ko Devleso jedinobijando Ćhavo. 19 A i osuda anela pe premalo akava: i svetlost alji ko sveto, ama o manuša manglje i tomnina, a na i svetlost, sose olenge delija hine lošna. 20 Sose okova so ćerela o lošnipe, mrzini i svetlost hem na avela ki svetlost, te na dićhon olese delija. 21 Ama ko ćerela okova soj tano ispravno, avela ki svetlost te bi dićhola soj tano odova so ćerela premali Devlesi volja.“ 22 Palo odova o Isus hem olese učenikija đelje ko judejska gava. Uduri aćhilje disavo vreme hem krstinđe e manušen. 23 A hem o Jovan krstinđa, ko Enon paše uzo Salim, sose ko odova than hine but pani hem o manuša alje te krstinen pe. 24 Odova hine angleder so o Jovan hine phanlo. 25 E Jovanese učenikija počminđe te ćeren kavga jekhe Judejcoja ando odova sar šaj te ovel pe čisto anglo Devel. 26 Palo odova alje ko Jovan hem phenđe lese: „Učitelju, okova kova hine tuvaja ki aver strana ando Jordan, kolestar tu svodočinđan, aće ov krstini hem sare đana koro leste.“ 27 A o Jovan phenđa: „O manuš našti ništa te dobini ako nane lese dindo ando nebo. 28 Kokri tumen hijen svedokija so phenđum: ’Me na hijum o Hrist, nego hijum bićhaldo anglo leste.‘ 29 Ko isi le bori, ov tano o đamutro. A e đamutreso amal terđola ki strana hem but radujini pe ked šunela e đamutreso glaso. Ađahar hem me hijum but bahtalo. 30 Ov valjani te barjol, a me valjani te ovav sa potikno.“ 31 Ko avela upral, ov tano upro sa avera. Ko avela andi phuv, vaćeri kotar odova soj tano ki phuv, sose andi phuv hem avela. Ko avela ando nebo, ov tano upro sa avera. 32 Ov vaćeri ando okova so dikhlja hem so šunđa, ama niko na prihvatini oleso svedočanstvo. 33 Ko prihvatini oleso svedočanstvo, ov potvrdini so o Devel vaćeri o ćaćipe. 34 Okova kas o Devel bićhalđa vaćeri e Devlese lafija, sose o Devel tano phravde vasteso ked dela po duh. 35 O Dad mangela pe Ćhave hem sa dinđa ko olese vasta. 36 Ko verujini ko Ćhavo, ka dobini večno životi. Ko na šunela e Ćhave, na ka dobini o životi, nego e Devlesi holi ka aćhol upro leste.