Izlazak

10 Ked o ćhavoro barilo, legarđa le ki faraonesi ćhaj hem oj lelja le te ovel olako ćhavo. Dinđa le anav Mojsije hem phenđa: „Nek vićini pe ađahar sose ikalđum le ando pani.“ 11 Jekh dive, ked o Mojsije barilo, đelo ko po narodo hem dikhlja kobor phari buti ćerena. Tegani dikhlja sar jekh Egipćanin marela jekhe ando olese phralja kova hine Jevrejin. 12 Dikhlja okolo peste hem ked dikhlja so nane niko, mudarđa e Egipćanine hem parunđa le ki pošik. 13 Tajsato dive, palem đelo koro lende hem dikhlja duj Jevreja sar marena pe. Odolese phenđa okolese kova hine krivo: „Sose mareja te amale?“ 14 A ov phenđa lese: „Ko ćhivđa tut te ove amenđe gospodari hem sudija? Te na mangeja hem man te mudare sar so mudarđan okole Egipćanine?“ Tegani o Mojsije but darandilo hem mislinđa ano peste: „Sigurno šundilo so ćerđum!“ 15 Ked o faraon šunđa aso odova, manglja te mudari e Mojsije. Ama, o Mojsije našlja ando faraon hem đelo ki madijansko phuv. Ked reslja uduri, bešlja uzo jekh bunari. 16 Tegani alje efta ćhaja ando madijansko svešteniko. Alje te pheren pani hem te pheren o kopane te bi olengo dadeso stado pijela pani. 17 Ama sar uvek, o pastirija alje hem uspudinđe len odothar. Tegani o Mojsije braninđa len hem dinđa pani olenge životinjenđe. 18 Ked alje ćhere ko po dad o Raguilo, ov pućlja len: „Sar avdije odobor sigate irinđen tumen ćhere?“ 19 A on phenđe: „Disavo Egipćanin braninđa amen ando pastirija, anđa pani hem dinđa e životinjenđe.“ 20 Tegani ov phenđa pe ćhajenđe: „Kaj tano ov? Sose aćhavđen le uduri? Vićinen le te hal maro amencar.“ 21 O Mojsije aćhilo te živini ko odova manuš, kova dinđa le romnjaće pe ćhaja, e Sefora. 22 Oj bijanđa murše, a o Mojsije dinđa le anav Girsam, sose phenđa: „Živinava ki tuđo phuv.“