1. Samuilova

5 Palo odova prastandilo đi ko Ilije hem phenđa lese: „Othe hijum, vićinđan man.“ Ama ov phenđa: „Na vićinđum tut. Đa hem pašljov.“ Ov đelo hem pašljilo. 6 Ama o Jehova palem vićinđa le: „Samuilo!“ O Samuilo uštilo hem đelo đi ko Ilije hem phenđa lese: „Othe hijum, vićinđan man.“ Ama ov phenđa lese: „Na vićinđum tut, mo ćhavo. Đa hem pašljov.“ 7 (Tegani o Samuilo pana na penđarđa šukar e Jehova hem pana na dobinđa lestar nisavi poruka.) 8 O Jehova vićinđa le o trito puti: „Samuilo!“ A ov uštilo, đelo đi ko Ilije hem phenđa lese: „Othe hijum, vićinđan man.“ Tegani o Ilije haljilo so o Jehova vićini e ćhave. 9 Odolese o Ilije phenđa e Samuilese: „Đa hem pašljov, pa ako palem vićini tut, tu phen: ’Vaćer, Jehova, sose to sluga šunela tut.‘ “ Ađahar o Samuilo đelo hem pašljilo ko po than. 10 Tegani o Jehova palem vićinđa le sar angleder: „Samuilo! Samuilo!“ A o Samuilo odgovorinđa: „Vaćer, sose to sluga šunela tut.“ 15 O Samuilo aćhilo te pašljol đi o sabaj, a palo odova phravđa o udara ando Jehovaso ćher. Ama, o Samuilo darandilo te phenel e Ilijese savi vizija hine le. 16 Ama o Ilije vićinđa e Samuile: „Samuilo, mo ćhavo!“ A ov phenđa: „Othe hijum!“ 17 Tegani pućlja le: „So phenđa tuće? Molinava tut, ništa ma garav mandar. Nek o Devel najphare kaznini tut ako na pheneja maje sa so phenđa tuće.“ 18 Tegani o Samuilo sa phenđa lese hem ništa na garavđa olestar. A o Ilije phenđa: „Odija tani e Jehovasi volja. Nek ovel sar ov so mangela.“ 19 O Samuilo barjola hine, a o Jehova hine oleja hem na mukhlja nijekh oleso lafi te na ispunini pe.