Luka

21 O Isus dikhlja sar o barvale ćhivena pe pare ki kasica aso prilogija. 2 Tegani dikhlja sar jekh ćorori udovica uduri ćhivela duj novčićija kola na hine len bari vrednost. 3 Hem phenđa: „Ćaće phenava tumenđe, akija ćorori udovica dinđa pobuter sarinendar. 4 Sose on dinđe odova so aćhilo lenđe, a akija romni ando po ćororipe dinđa sa so hine la.“ 7 Tegani pućlje le: „Učitelju, ked ka ovel odova hem so ka ovel o znak so alo o vreme te desini pe odova?“ 9 Hem ked šunena aso mariba hem nemirija, ma daran. Sose odova valjani najangleder te ovel, ama o kraj na ka avel odmah.“ 10 Palo odova phenđa lenđe: „Ka uštel o narodo upro narodo hem o kraljevstvo upro kraljevstvo. 11 Ka oven bare zemljotresija, zarazna nabormipa hem bokhalipa ko razna thana. Odova so ka dikhen o manuša ka daravi len hem ka oven bare znakija ando nebo. 12 „A angleder sa akava, ka progoninen tumen hem ka astaren tumen, ka predajinen tumen ko sinagoge hem ko phanlipa. Ka igaren tumen anglo kraljija hem namesnikija sebepi mo anav. 13 Odova ka ovel tumenđe prilika te svedočinen. 15 Me ka dav tumen mudrost hem me ka pomožinav tumen te đanen so te vaćeren hem tumare dušmanija na ka đanen so te odgovorinen tumenđe. 17 Sare ka mrzinen tumen sebepi moklo anav. 19 Ako ka istrajinen đi o krajo, tumen ka arakhen tumaro đivdipe. 20 Ked ka dikhen so i vojska ćedinđa pe oko Jerusalim, te đanen soj tano oleso kraj but paše. 21 Tegani okola kola ka oven ki Judeja neka našen ko planine. Okola kola ka oven ko Jerusalim neka mukhen le, a okola so ka oven ko gava ma te khuven koro leste. 22 Sose odola tane o dive ked ka ćerel pe odova soj tano pravedno, te ispunini pe sa soj tano pisimo. 23 Kobor samo pharo ka ovel e romnjenđe kola tane khamnja hem okolenđe kola dena thud pe ćhavenđe. Sose upri akija phuv ka avel bari nevolja hem upro akava narodo ka mothovi pe bari holi. 24 Disave ka peren kotar mač, a avera ka oven legarde sar robija ko sa o narodija. O Jerusalim ka gazinen o narodija kola na služinena e Devlese sa đi na nakhela o vreme soj tano odredimo e narodonđe kola na služinena e Devlese. 26 O manuša ka našaljen pi svest sebepi i dar hem sebepi odova so ka ovel ko sveto, sose o nebeska sile ka tresinen pe. 27 Tegani ka dikhen e manušikane Ćhave sar avela ko oblako silaja hem bare slavaja. 28 A ked ka počmini sa odova, terđoven hem vazden tumaro šero, sose tumaro spasenje tano paše.“ 31 Isto ađahar, ked ka dikhen so sa odova ovela, đanen so e Devleso Kraljevstvo tano paše. 34 Ama, pazinen upro tumende tumaro vilo te na ovel opteretimo bute hajbaja, pijbaja hem e problemencar ando đivdipe, te na astari tumen hem te na iznenadini tumen odova dive 35 sar zamka. Sose iznenada ka avel upro sa o manuša kola živinena ki phuv. 36 Odolese aćhoven đangavde hem sa odova vreme molinen tumen ando vilo, te šaj te našen kotar sa akala buća so valjani te oven hem te šaj te terđoven anglo manušikano Ćhavo.