Jezdra

1 Prvo berš andi Kiresi vladavina, kova hine kralj ki Persija, te šaj te ispunini pe e Jehovaso lafi kova hine vaćerdo prekalo Jeremija, o Jehova podstakninđa e persijsko kralje e Kire ko celo poklo kraljevstvo te phenel hem te pisini akava: 2 „Ađahar phenela o persijsko kralj, o Kir: ’O Jehova, o nebesko Devel, dinđa man sa o kraljevstvija ki phuv hem zapovedinđa maje te ćerav lese ćher ko Jerusalim ki Juda. 3 Svako maškaro tumende, koj tano ando oleso narodo, nek oleso Devel ovel oleja. Nek đal ko Jerusalim ki Juda hem palem nek ćerel ćher e Jehovase, e Izraelese Devlese, kova tano pravo Devel, kaso ćher hine ko Jerusalim. 4 Svakonese kova živini sar stranco ko disavo than o manuša ando odova than nek pomožinen olese, ađahar so ka den le zlato, srebro, avera buća kola isi len hem e životinjen, sar hem o dobrovoljna prinosija aso ćher ando ćaćutno Devel ko Jerusalim.‘ “ 5 Tegani o poglavarija ando Judase hem Venijaminese plemenska porodice, o sveštenikija hem o Levitija – sare kas podstakninđa o pravo Devel – počminđe palem te gradinen e Jehovaso ćher ko Jerusalim. 6 A sa kola hine uzo lende pomožinđe lenđe ađahar so dinđe len o predmetija ando srebro hem ando zlato, disave avera buća kola hine len, i stoka hem avera dragocena buća, sar hem o dobrovoljna prinosija aso e Devleso ćher.