Jovan
13 Angleder i Pasha, o Isus đanđa so alo leso vreme te mukhel akava sveto hem te đal ko po Dad. Sebepi so manglja peklen kola hine ko sveto, mothovđa lenđe mangipe sa đi o krajo. 2 O Isus hem olese učenikija zajedno halje maro, a o Beng e Judase, e ćhavese ando Simon Iskariotski, ćhivđa ko vilo i želja te izdajini e Isuse. 3 O Isus đanđa so oleso Dad mukhlja sa ko olese vasta, so alo ando Devel hem so ka irini pe ko Devel. 4 Tegani uštilo ando astali, mukhlja po ogrtači, lelja o peškiri hem phanlja pe oleja. 5 Palo odova ćhorđa o pani ko legeni hem počminđa te thovel pe učenikonenge pre hem te kosel len peškireja kova phanlja pe. 12 Ked thovđa lenge pre, palem lelja po ogrtači, irinđa pe ko astali hem pućlja len: „Da li haljona sose thovđum tumare pre? 13 Tumen vićinena man ’Učitelju‘ hem ’Gospode‘, hem ađahar tano, sose odova hem hijum. 14 Odolese, ako me o Gospod hem o Učitelj, thovđum tumare pre, hem tumen valjani te thoven jekh jekhese pre. 15 Dinđum tumenđe primer hem tumen te ćeren ađahar sar so me ćerđum tumenđe. 17 Akana ked odova đanena, bahtale hijen ako ađahar hem ćerena. 34 Dava tumen nevi zapovest: Mangen jekh jekhe. Sar so me mangljum tumen, ađahar hem tumen mangen jekh jekhe. 35 Premalo odova sare ka đanen so hijen me učenikija, ako mangena jekh jekhe.