Rimljanima

6 Sose o telesno razmislibe anela meribe, a o duhovno razmislibe anela životi hem mir. 15 Sose e Devleso duho na ćhivela tumen te oven robija hem te daran, nego prekalo odova duh amen hijam usvojime sar ćhave, hem odova duho ćhivela amen te phena: „Ava, mo Dad!“ 16 E Devleso duho jasno mothovi amenđe so hijam e Devlese ćhave. 17 A ako hijam ćhave, tegani hijam hem o naslednikija – e Devlese naslednikija, a e Hristese sunaslednikija. Sose ako zajedno oleja patinaja, ka ova hem proslavime zajedno oleja. 19 Sose sa soj tano stvorimo jedva ađićeri te oven objavime e Devlese ćhave. 20 Sose odova soj stvorimo tano podložimo disose so na vredini, na sebepi so manglje, nego prekalo okoleste kova ćerđa len podložna, ama hine dindi hem nada 21 so sa soj tano stvorimo više na ka ovel robo ando telo kova raspadini pe hem ka dobinen i slavno sloboda e Devlese ćhavengi. 22 Sose đanaja so sa soj tano stvorimo zajedno uzdišini hem ko dukha tano sa đi akana. 25 A ako nadinaja amen e bućenđe kola na dikhaja, odova istrajno ađićeraja. 26 Ađahar hem o duho pomožini amen ked hijam slaba. Sose podijekh puti na đanaja aso so te molina amen, ama o duh zauzmini pe amenđe ked lafencar našti te phena odova so osetinaja. 31 So tegani ka phena? Ako tano o Devel amencar, ko ka ovel protiv amende? 32 Ako pe Ćhave na arakhlja ando meribe, već dinđa le sebepi amaro, na ka del amen li hem sa aver so valjani amenđe? 34 Ko ka osudini len? Niko, sose o Isus Hrist mulo, a hem uskrsninđa. Ov tano ki desno strana ando Devel hem molini le amenđe. 35 Ko ka ulavi amen ando Hristeso mangipe? Da li o pharipe ja i muka ja o progonstvo ja o bokhalipe ja o ćororipe ja i opasnost ja o mač? 36 Sar soj tano pisimo: „Sebepi toklo stalno mudarena amen, dikhena amen sar bakre kolen ka ćhinen.“ 37 Ama ko sa odova pobedinaja sose pomožini amen okova kova manglja amen. 38 Sose uverimo hijum so ni o meribe, ni o životi, ni o anđelija, ni o vlastija, ni odova soj tano akana, ni odova so ka avel, ni o sile, 39 ni odova soj tano ućo, ni odova soj tano hor, ni bilo so aver soj tano stvorimo, našti te ulavi amen ando Devleso mangipe kova ov mothovi amenđe prekalo Hrist Isus, amaro Gospod.