Luka

1 But đene manglje te pisinen ando događaja ko kola potpuno uverinđam amen, 2 ađahar sar so vaćerđe amenđe okola kola ando početko dikhlje odola događaja hem kola vaćerđe e Devleso lafi. 3 Odolese hem me, časno Teofile, palo odova so pažljivo istražinđum sa ando početko, odlučinđum sa te pisinav tuće redoja, 4 te uverine tut soj tane ćaće sa o buća kola sikavđe tut. 5 Ko dive ando judejsko kralj Irod, živinđa jekh svešteniko kova vićinđa pe Zaharija, andi Avijasi grupa. Olesi romni hine andi Aronesi porodica hem vićinđa pe Jelisaveta. 6 O solduj hine pravedna anglo Devlese jaćha sose besprekorno ićerđe pe ko sa e Jehovase zapovestija hem zakonija. 7 Ama, na hine len ćhave sose i Jelisaveta naštine te aćhol khamni, a o solduj hine ko phure berša. 8 Jekh dive, o Zaharija ćerđa pi svešteničko služba anglo Devel, sose premalo raspored služinđa olesi grupa. 9 Premalo svešteničko običaj, žreboja hine odredimo ov te khuvel ko Jehovaso svetilište hem te del o kad. 10 Đi dinđa pe o kad, sa o manuša kola ćedinđe pe molinđe pe avrijal. 11 Tegani e Zaharijase pojavinđa pe e Jehovaso anđeo. Ov terdilo ki desno strana ando kadiono oltari. 12 Ked dikhlja le, o Zaharija hine uznemirimo hem ukljinđa le i dar. 13 Ama o anđeo phenđa lese: „Ma dara, Zaharija, sose o Devel šunđa te molitve ando vilo hem ti romni i Jelisaveta ka bijani murše. De le anav Jovan. 14 Ka ove bahtalo hem ka veseline tut hem but đene ka oven bahtale ked ov ka bijanđol, 15 sose ka ovel baro anglo Jehovase jaćha. Ama, na ismini te pijel vino ja bilo so aver sostar šaj te maćol. Ka ovel pherdo sveto duhoja pana angleder so ka bijanđol. 16 Ka pomožini butenđe ko izraelsko narodo te irinen pe e Jehovase, pe Devlese. 17 Ka đal anglo Devel pherde duhoja hem snagaja sar o Ilija, ka ćerel e dadengo vilo te ovel sar e ćhavorengo vilo hem ka pomožini okolenđe kola nane poslušna te postupinen mudro sar o pravednikija hem ka pripremini e narodo e Jehovase.“ 18 O Zaharija phenđa e anđelese: „Sar šaj odova te ovel? Me hijum phuro hem mi romni tani ko phure berša.“ 19 O anđeo phenđa lese: „Me hijum o Gavrilo, kova terđola anglo Devel. Ov bićhalđa man te vaćerav tuće akija šukar vest. 20 Ama, sebepi so na verujinđan ko me lafija, kola ka ispuninen pe ko po vreme, ka aćhove laloro hem na ka šaj te vaćere đi o dive ked odova ka ovel. 21 A o manuša ađićerđe e Zaharija hem čudinđe pe so odobor aćhilo ko svetilište. 22 Ked ikljilo, naštine te vaćeri hem on haljilje so ko svetilište dikhlja disavo čudo. Sebepi so naštine te vaćeri, pokušinđa vastencar te haljol pe olencar. 23 A ked nakhlje o dive andi olesi služba, đelo ćhere. 24 Palo disavo vreme, olesi romni i Jelisaveta aćhilji khamni. Panđ masek na ikljilji kotar ćher. Oj phenđa: 25 „O Jehova odova ćerđa maje. Smilujinđa pe maje hem cidinđa mandar i lađ.“ 26 Ked hine ko šovto masek, o Devel bićhalđa e anđele, e Gavrilo, ki galilejsko diz ko Nazaret, 27 ki ćhaj koja vićinđa pe Marija. Oj hine verimi e Josifeja, kova hine andi Davidesi loza. 28 Ked o anđeo alo koro late, phenđa laće: „Zdravo, tu koja hijan but blagoslovimi, o Jehova tano tuvaja.“ 29 Ked šunđa odova, oj darandilji hem počminđa te razmislini so značinena odola lafija. 30 Odolese o anđeo phenđa laće: „Ma dara, Marija, sose o Devel tano zadovoljno tuvaja. 31 Aće, ka aćhove khamni hem ka bijane murše. Ćhiv leso anav Isus. 32 Ov ka ovel baro hem ka vićini pe Ćhavo ando Najbaro. O Jehova, o Devel, ka del le olese dadeso presto, e Davideso 33 hem ov zauvek ka vladini sar Kralj upro Jakoveso ćher hem olesi vlast niked na ka ćhinavđol.“ 34 I Marija pućlja e anđele: „Sar šaj te ovel odova ked me pana hijum ćhaj?“ 35 O anđeo phenđa laće: „O sveti duh ka huljel upro tute hem i sila ando Najbaro ka avel upro tute. Odolese, o ćhavoro kas ka bijane ka ovel sveto hem ka vićini pe e Devleso Ćhavo. 36 Aće, hem ti rođaka i Jelisaveta ka bijani ćhave, iako tani ko phure berša. O manuša đanđe so našti te aćhol khamni, a akana tani ko šovto masek. 37 Sose e Devlese ništa nane nemoguće.“ 38 Tegani i Marija phenđa: „Me hijum e Jehovasi robinja! Nek ovel ađahar sar so phenđan maje.“ Palo odova, o anđeo đelo olatar. 39 Odola dive i Marija spreminđa pe hem sigate đelji ki jekh diz ko judejska bregija. 40 Ked reslja othe, khuvđa ko Zaharijaso ćher hem pozdravinđa e Jelisaveta. 41 Samo so i Jelisaveta šunđa e Marijako pozdrav, o ćhavo ko olako vođi ripinđa. I Jelisaveta pherdilji sveto duhoja 42 hem ko glaso phenđa: „Blagoslovimi hijan maškaro romnja hem blagoslovimo tano o plod ko to vođi! 43 Sova zaslužinđum odija čast i daj ando mo Gospod te avel koro mande? 44 Sose samo so šunđum to pozdrav, o ćhavo ko mo vođi ripinđa andi radost. 45 Bahtali tani okija so verujinđa, sose ka ispunini pe sa odova so o Jehova phenđa laće.“ 46 A i Marija phenđa: „Mi duša hvalini e Jehova 47 hem mo vilo radujini pe sebepi sa odova so o Devel, mo Spasitelj, ćerđa maje, 48 sose o Devel dikhlja upri jekh nevažno ćhaj koja služini lese. Ando akana sa o generacije ka phenen so hijum bahtali, 49 sose o baro Devel ćerđa maje but šuže buća hem sveto tano oleso anav. 50 Andi generacija ki generacija ov tano milostivo premalo okola so darana olestar. 51 Ov pe vasteja ćerđa moćna delija, uspudinđa okolen kola tane ohola. 52 Okolen soj tane moćna fordinđa ando olenge prestolija, a okolen soj tane nevažna vazdinđa len, 53 e bokhalen ćaljaćerđa, a e barvalen aćhavđa ćuće vastencar. 54 Alo te pomožini pe slugase e Izraelese sebepi pi milost, 55 sar so obećinđa amare paradadenđe so zauvek ka ovel milostivo e Avrahamese hem olese ćhavenđe.“ 56 I Marija aćhilji koro late oko trin masek, a palo odova irinđa pe ćhere. 57 Alo o vreme i Jelisaveta te bijani hem bijanđa murše. 58 Olake komšije hem o rođakija šunđe so o Jehova mothovđa laće but bari milost hem radujinđe pe olaja. 59 Alje oftoto dive ked valjanđe te obrezinen e ćhave hem manglje te den le e dadeso anav, Zaharija. 60 Ama i daj phenđa: „Na, ov ka vićini pe Jovan.“ 61 Ko odova phenđe laće: „Nane niko ki ti familija ko ađahar vićini pe.“ 62 Palo odova, vastencar pućlje e dade sar ov mangela te vićini pe o ćhavo. 63 Ov rodinđa i tablica aso pisibe hem pisinđa: „Oleso anav tano Jovan.“ Tegani sare hine iznenadime. 64 Ko isto trenutko palem počminđa te vaćeri hem te hvalini e Devle. 65 Sa olenge komšije hine oduševime hem ko sa o judejska bregija počminđe te vaćeren kotar sa odova. 66 Sare kola šunđe aso odova, razmislinđe odolestar hem pućlje pe: „So ka ovel ando akava ćhavoro?“ Sose hine jasno soj tano o Jehova oleja. 67 Tegani o Zaharija, oleso dad, pherdilo sveto duhoja hem počminđa te vaćeri o lafija ando Devel: 68 „Nek ovel hvalimo o Jehova, e Izraeleso Devel, sose smilujinđa pe upro po narodo hem spasinđa le. 69 Hem dinđa amen moćno spasitelje andi pe slugasi, e Davidesi loza, 70 sar so vaćerđa prekalo pe sveta prorokija pana ando purano vreme, 71 so ka spasini amen ando amare dušmanija hem ando okola so mrzinena amen, 72 so ka mothovi amenđe milosrđe, sar so obećinđa amare paradadenđe, hem so ka setini pe ko po sveto savez, 73 ki sovli koja dinđa amare paradadese e Avrahamese, 74 so, ked ka ova izbavime ando dušmanenge vasta, ka del amen te služina lese bizi dar, 75 verno hem pravedno celo amaro đivdipe. 76 A tu ćhavoreja, ka ove vićimo proroko ando Najbaro, sose ka đa anglo Jehova te pripremine lese o drumija, 77 te sikave olese narodo so o spasenje ka ovel moguće ked olenge grehija ka oven oprostime, 78 sebepi i bari samilost ando amaro Devel. Odija samilost ka osvetlini amen ando nebo sar ked ikljola o kham, 79 hem ka anel svetlost okolenđe kola bešena ti tomnina hem ki senka ando meribe, te anel amen ko drumo ando mir.“ 80 A o ćhavo barilo hem ulo zrelo manuš. Živinđa ki pustinja sa đi na alo o vreme te počmini pi služba ko Izrael.