Jovan

11 Jekh manuš kova vićinđa pe Lazar hine nabormo. Ov živinđa ki Vitanija, ko gav kaj živinđe i Marija hem olaki phen i Marta. 2 I Marija hine odija koja kasnije ćhorđa o mirisno ulje upro Gospod hem koslja olese pre pe balencar. O Lazar, kova hine but nabormo, hine olako phral. 3 Odolese, olese phenja javinđe e Isusese: „Gospode, to manglo amal tano nabormo.“ 4 Ked o Isus šunđa odova, phenđa: „Akava nabormipe ko krajo na ka završini pe meribaja, već ka anel slava e Devlese, te šaj e Devleso Ćhavo sebepi odova ovela proslavimo. 5 O Isus manglja e Marta, olake phenja hem e Lazare. 11 Palo odova ov pana phenđa: „O Lazar, amaro amal, zasuća, a me đava te vazdav le kotar sojbe.“ 12 Ko odova o učenikija phenđe lese: „Gospode, ako sovela, odova značini so ka ovel lese pošukar.“ 13 O Isus vaćerđa ando oleso meribe, a on mislinđe so ov phenđa lenđe so o Lazar sovela hem so odmorini pe. 14 Tegani o Isus phravdo phenđa lenđe: „O Lazar mulo. 21 I Marta phenđa e Isusese: „Gospode, te ove hine akate, mo phral na bi merela. 22 Ama, me čak hem akana hijum sigurno, so o Devel ka del tut sa so ka rode olestar.“ 23 A o Isus odgovorinđa laće: „To phral ka uštel.“ 24 I Marta phenđa lese: „Đanava so ka uštel ko uskrsenje ko poslednjo dive.“ 25 Tegani o Isus phenđa laće: „Me hijum o uskrsenje hem o đivdipe. Ko verujini koro mande, čak hem te merel, palem ka živini. 26 Hem svako ko živini hem verujini koro mande, niked na ka merel. Da li verujineja ko odova?“ 32 I Marija đelji đi odova than kaj hine o Isus. Ked dikhlja le, pelji anglo olese pre hem phenđa lese: „Gospode, te ove hine akate, mo phral ne bi merela.“ 33 Ked o Isus dikhlja sar oj rovela hem sar rovena o Judejcija kola alje olaja, hine lese but pharo hem hine tužno. 34 Ov pućlja: „Kaj ćhivđen le?“ On phenđe lese: „Gospode, ava te dikhe.“ 35 Hem o Isus počminđa te rovel. 36 Tegani o Judejcija phenđe: „Dikhen, kobor manglja le!“ 38 Tegani o Isus hine but žalosno hem đelo đi o grobo. Odova hine u stvari jekh pećina, kaso ulaz hine phanlo jekhe bareja. 39 O Isus zapovedinđa: „Ciden o bar!“ A i Marta, i phen ando mulo manuš, phenđa lese: „Gospode, akana sigurno but khandela, sose nakhlje štar dive sar mulo.“ 40 A o Isus phenđa laće: „Zar na phenđum tuće so ka dikhe e Devlesi slava ako ka verujine?“ 41 Tegani cidinđe o bar. A o Isus dikhlja premalo nebo hem phenđa: „Mo Dad, hvala tuće so šunđan mi molitva. 42 Me đanđum so uvek šuneja man, ama akava phenđum sebepi o manuša kola tane akate, te šaj te verujinen so tu bićhalđan man.“ 43 Ked phenđa odova, vićinđa ko sa o glaso: „Lazare, ikljov!“ 44 O manuš kova hine mulo ikljilo. Olese pre hem o vasta hine paćarde zavojencar, a oleso muj hine paćardo platnoja. Tegani o Isus phenđa lenđe: „Ikalen odova olestar te šaj te phirel.“ 45 But Judejcija kola alje ki Marija hem dikhlje so ćerđa počminđe te verujinen ano leste. 46 Ama disave olendar đelje ko fariseja hem vaćerđe lenđe so o Isus ćerđa.