1. Petrova

5 E starešinen maškaro tumende podstakninava, sose hem me hijum starešina, svedoko ando Hristese muke hem neko ko ka ovel le deo ki slava koja ka mothovi pe: 2 Sar pastirija, brininen tumen ando Devleso stado kova tano tumenđe dindo, ađahar so služinena sar nadglednikija. Ma ćeren odova zorjeja, nego sebepi so mangena, sar soj tano hem pali Devlesi volja, na sebepi i korist nego celone vileja. 3 Ma gospodarinen upro okola kola pripadinena e Devlese, nego oven primer e stadose. 4 A ked ka pojavini pe o vrhovno pastiri, ka priminen o venco kotar slava kova na venoni. 5 Ađahar hem tumen, ćhavalen, oven podložna e starešinenđe. A sare tumen oven ponizna jekh premalo jekheste, odolese so o Devel suprotstavini pe okolenđe soj tane ohola, a po bizaslužimo šukaripe mothovi premalo ponizna. 6 Odolese, ponizinen tumen talo e Devleso moćno vas, te šaj ov te vazdel tumen ked ka avel o vreme. 7 Hem sa tumare brige forden koro leste, sose ov brinini pe tumendar. 8 Oven đangavde hem pazinen! Tumaro protivniko, o Beng, phirela okolo sar ričućo lav hem rodela kas te hal. 9 A tumen suprotstavinen tumen olese, aćhoven zorale ki vera, odolese so đanena so odola ista patnje doživinena hem tumare phralja ko celo sveto. 10 A palo odova so hari ka trpinen o pharipa, o Devel kotar svako bizaslužimo šukaripe, kova vićinđa tumen te oven ko jekhipe e Hristeja hem te priminen i večno slava, ka završini tumari obuka đi o krajo. Ov ka zorjaćeri tumen, ka pomožini tumenđe te aćhon verna hem ka pomožini tumenđe te na peren.