Filipljanima

4 Odolese, me mangle phralja, kolen jedva ađićerava te dikhav, me mangle, kola hijen mi radost hem mi kruna, aćhoven ko jekhipe e Gospodeja sar so hem sikavđum tumen. 2 Podstakninava e Evodija hem e Sintihija te služinen složno e Gospodese. 3 Molinava hem tut, me verno saradniko, pomožin odole romnjenđe kola borinđe pe asi šukar vest zajedno mancar hem e Klimenteja hem me avere saradnikonencar, kase anava tane zapisime ki knjiga ando životi. 4 Uvek radujinen tumen ko Gospod. Hem palem phenava tumenđe: Radujinen tumen! 5 Tumari razumnost nek ovel penđardi sa e manušenđe. O Gospod tano paše. 6 Ma brininen tumen nisose, nego sa tumare brige vaćeren e Devlese ki molitva, celone vileja molinen tumen olese hem zahvalinen tumen olese. 7 Hem e Devleso mir, kova tano upreder odova so o manuš šaj te haljol, ka arakhi tumaro vilo hem tumari godi prekalo Hrist Isus. 8 Ko krajo, phraljalen, razmislinen kotar sa soj tano ćaće, soj tano važno, soj tano pravedno, soj tano čisto, so ćhivela tut te mothove mangipe, soj tano pohvalno, soj tano pristojno hem so šaj te pohvaline. 9 Ićeren tumen ko odova so sikljiljen, so prihvatinđen, so šunđen hem so dikhljen mandar hem tegani o Devel ando mir ka ovel tumencar. 11 Na phenava odova sose falini maje diso, sose sikljiljum te ovav zadovoljno ko save god okolnostija te ovav. 12 Đanava so značini ked isi tut hari, a đanava hem so značini ked isi tut but. Sikljiljum sar te ovav zadovoljno ko sa, ki svako prilika - hem ked o manuš tano ćalo hem ked tano bokhalo, hem ked isi le but hem ked isi le hari. 13 Sa šaj te ćerav prekalo okoleste kova dela man snaga. 16 Đi hijum le ko Solun, bićhalđen maje odova so valjanđa maje, hem odova na jekhvar već duvar. 18 Isi man sa so valjani maje, pa čak hem pobuter. Sar o Epafrodit anđa maje odova so bićhalđen, ništa na falini maje. Odova poklon tano sar šužo miris, žrtva koja o Devel prihvatini sose tani pali olesi volja. 19 A mo Devel kova tano but barvalo ka del tumen sa odova so valjani tumenđe prekalo Hrist Isus.