Matej

4 Tegani o duh legarđa e Isuse ki pustinja, kaj iskušinđa le o Beng. 2 Palo odova so postinđa 40 dive hem 40 raća, bokhalilo. 3 Tegani o Beng alo te iskušini le hem phenđa lese: „Ako hijan e Devleso ćhavo, phen akale barenđe te oven maro.“ 4 A ov odgovorinđa lese: „Pisimo tano: ’O manuš na živini samo ando maro, nego hem ando svako lafi kova ikljola ando Jehovaso muj.‘“ 5 Tegani o Beng legarđa le ki sveto diz, ćhivđa le ko vrh ando hramsko zido 6 hem phenđa lese: „Ako hijan e Devleso ćhavo, forde tut tele, sose tano pisimo: ’Pe anđelenđe ka zapovedini te arakhen tut‘ hem ’on ka akharen tut ko pe vasta, te na bi khuveja to pro ko bar.‘ “ 7 A o Isus ko odova phenđa lese: „Ama pisimo tano hem akava: ’Ma iskušin e Jehova, te Devle.‘ “ 8 Palo odova, o Beng legarđa le ki jekh but ući gora hem mothovđa lese sa o kraljevstvija ando akava sveto hem olengi slava. 9 hem ov phenđa lese: „Sa akala buća ka dav tut, ako pereja anglo mande hem poklonineja tut maje.” 10 Tegani o Isus phenđa lese: „Naš, Satano! Sose tano pisimo: ’E Jehovase, te Devlese, klanin tut hem samo olese služin.‘ “ 11 Tegani o Beng aćhavđa le. Hem alje o anđelija hem dinđe le okova so valjanđa lese. 13 Palo odova, đelo ando Nazaret te živini ko Kapernaum, uzo more, ko područje ando Zavulon hem Neftalim. 14 Ađahar ispuninđa pe okova so hine phendo prekalo prorok Isaija: 15 „Tumen andi Zavulonesi phuv hem andi Neftalimesi phuv so hijen ko drumo uzo more, ki aver strana ando Jordan, andi Galileja kuri živinena o manuša ando avera narodija! 16 O manuša kola živinđe ki tomnina dikhlje but bari svetlost hem oj svetlinđa okolenđe kola živinđe ki phuv kuri o meribe ućharđa e manušen sar senka.“ 17 Tegani o Isus počminđa te propovedini: „Pokajinen tumen sose paše tano o nebesko Kraljevstvo.“ 18 Đi phirđa uzo Galilejsko more, dikhlja duje phralen, e Simone, kas vićinđe Petar, hem olese phrale, e Andrija, sar fordena o mreže ko more sose hine ribarija. 19 Hem phenđa lenđe: „Aven mancar, hem ka ćerav tumen te oven ribarija ando manuša.“ 20 On odmah aćhavđe o mreže hem đelje oleja. 23 O Isus đelo ki celo Galileja, sikavđa ko olenge sinagoge hem propovedinđa lenđe i šukar vest ando Kraljevstvo hem saćarđa svako nabormipe hem sarinen kola nane len takati.