Psalam
119 Bahtale tane okola kola živinena besprekorno, kola živinena premalo Jehovase zakonija. 2 Bahtale tane okola so ićerena pe ko olese opomene, kola rodena le celone vileja. 9 So valjani jekh terno ćhavo te ćerel ako mangela oleso životi te ovel čisto? Nek pazini upro peste hem nek ićeri pe ko to lafi. 10 Celone vileja rodava tut. Ma mukh te cidav man ando te zapovestija. 18 Phrav me jaćha te šaj jasno te dikhav kobor tano šužo to zakon. 24 Mangava te opomene, on tane me savetnikija. 31 Ićerava man ko te opomene. Jehova, ma mukh te razočarinav man. 32 Celone vileja ka ićerav man ko te zapovestija, sose tu ćereja than ko mo vilo te šaj on te resen ano leste. 34 Pomožin man te haljovav to zakon, te šaj te ićerav le, te šaj te ićerav le celone vileja. 36 Pomožin maje te mangav te ićerav man ko te opomene, te na postupinav premalo me sebična želje. 37 Cide me jaćha ando buća kola ništa na vredinena, arakh man hem pomožin man te aćhovav đivdo ko mo drumo. 45 Kuri god te đav, ka ovel man mir, sose trudinava man te ićerav man ko tekle zapovestija. 46 Anglo kraljija ka vaćerav ando te opomene hem na ka lađav. 47 Uživinava ko te zapovestija, ćaće mangava len. 50 Odova utešini man ki nevolja, to lafi ićeri man ko životi. 51 O ohola marena maje muj, ama me na cidava man ando to zakon. 52 Jehova, ki godi avena manđe te presude kotar purano vreme hem ađahar dobinava uteha. 59 Razmislinava kotar mo životno drumo te šaj te irinav man ko tekle opomene. 60 Siđarava hem na našava ando odova te ićerav man ko te zapovestija. 61 Paćarđe man e lošnonenge šele, ama me na bistrava to zakon. 63 Amal hijum sarinencar kola darana tutar hem kola ićerena pe ko te zapovestija. 66 Sikav man te ovav razborito hem de man đandipe, sose uzdajinava man ko te zapovestija. 68 Tu hijan šukar hem šukar ćereja. Sikav man te propisija. 71 Šukar tano so hijum ko pharipa sose ađahar ka sikljovav te zakonija. 76 Molinava tut, nek to verno mangipe utešini man, sar so obećinđan te slugase. 81 Jedva ađićerava o spasenje kova tu deja, sose uzdajinava man ko to lafi. 96 Dikhljum but buća kola tane savršena, ama te zapovestija tane pošukar kotar sa odola buća. 97 Kobor mangava to zakon! Celo dive razmislinava olestar. 101 Cidava man ando svako lošno drumo te šaj te ićerav man ko to lafi. 103 Kobor tane gudle te lafija me ćhibjaće, me mujese tane pogudle ando avđin! 105 To lafi tano sar svetiljka me prese hem sar svetlo me drumose. 112 Odlučinđum te ićerav man ko te propisija celo đivdipe, đi o krajo. 113 Mrzinava okolen kola služinena tuće ekvaš vileja, a mangava toklo zakon. 127 Mangava te zapovestija pobuter ando zlato, pobuter ando čisto zlato. 128 Odolese mislinava so sa te savetija tane ispravna. Mrzinava svako lošno drumo. 130 Ked te lafija tane objasnime, on anena svetlost, dena razboritost okolenđe kola nane iskusna. 133 Legar me korakija te lafeja, ma mukh te peravi man nisavo lošnipe. 138 Te opomene tane pravedna hem potpuno pouzdana. 144 Te opomene večno ka oven pravedna. De man razboritost, te bi aćhovava đivdo. 160 Celo to lafi tano ćaćipe, hem sa te zakonija tane pravedna hem večna. 163 Mrzinava o hovajbe, ov gadoni pe maje, a to zakon mangava. 164 Efta putija ko dive hvalinava tut sebepi tekle pravedna zakonija. 165 Baro mir isi len okola kola mangena to zakon, ništa našti te ćhivel len te spotakninen pe.