1. Petrova
3 Ađahar hem tumen, romnjalen, oven podložna tumare romenđe, te šaj okolen kola na šunena e Devleso lafi te pridobinen bizo lafi odoleja so ćerena, 2 ked ka dikhen tumare šukar delija hem tumaro hor poštovanje. 3 Ma mukhen tumaro šužipe te ovel samo avrijal, sar soj tano te khuven pe o bala, te akhari pe o zlato ili o skupa šeja 4 nego nek šužjaćeri tumen okova soj tano garavdo ko vilo, o šužipe kova na nakhela, a odova tano o mirno hem o blago duh, kova tano but vredno anglo Devlese jaćha. 5 Sose ađahar angleder ukrasinđe pe o verna romnja, kola uzdajinđe pe upro Devel hem hine podložna pe romenđe. 6 Ađahar i Sara hine poslušno e Avrahamese hem vićinđa le gospodare. A tumen hijen olake ćhaja ako ćerena okova soj tano šukar hem na mukhena ništa te daravi tumen. 7 Ađahar hem tumen, romalen, živinen tumare romnjencar premalo odova so sikljiljen. Poštujinen len, sose o romnja tane poslaba, sar o ćare kola lokho phađona hem sose on tumencar nasledinena o bizaslužimo dar ando životi. Ako na ćerena odova, o Devel na ka šunel tumare molitve. 8 Ko krajo, sare oven složna ko razmislibe, saosećajna, pherde phralikane mangipaja, hor samilosna hem ponizna. 9 Ma irinen o lošnipe e lošnipaja niti i uvreda asi uvreda. Umesto odova, tumen blagoslovinen len, sose ko odova hijen vićime, te šaj te dobinen o blagoslov. 11 Nek cidel pe ando lošnipe hem nek ćerel odova soj tano šukar, nek rodel o mir hem nek ćerel te ovel mir. 12 Sose e Jehovase jaćha dikhena e pravednikonen hem olese kana šunena olenge usrdna molitve, ama o Jehova irini po dumo okolenđe kola ćerena lošna buća. 14 Ama ako hem valjani te trpinen odolese so hijen pravedna, bahtale hijen. Ma daran kotar odova sostar on darana hem ma oven uznemirime. 15 Ama o Hrist sar Gospod nek ovel sveto ko tumaro vilo hem uvek oven spremna te objasninen o razlog andi tumari nada anglo svakoneste ko rodela tumendar odova, ama đi ćerena odova mothoven blagost hem hor poštovanje. 16 Arakhen i čisto savest, te šaj okola kola vaćerena protiv tumende – so god odova te ovel – te lađan sebepi tumaro šukar hrišćansko ponašanje. 18 Sose o Hrist jekhvar hem zauvek mulo aso grehija, o pravedniko aso nepravedna manuša, te anel tumen đi o Devel. Hine mudardo ko telo, ama hine irimo ko životi sar duho. 19 Palo odova đelo te propovedini e duhonenđe ki tamnica, 20 kola hine neposlušna ked o Devel strpljivo ađićerđa ko Nojese dive. Ko odova vreme ćerđa pe i arka, kuri samo nekobor manuša, samo ofto đene, nakhlje o pani hem spasinđe pe. 21 Odoleja hine predstavimo o krštenje kova akana hem tumen spasini prekalo uskrsenje ando Isus Hrist. (O krštenje na ikali i telesno mel, nego tano molba vaćerdi e Devlese asi čisto savest.) 22 O Hrist tano ki Devlesi desno strana, sose đelo ko nebo hem podložna tane olese o anđelija, o vlastija hem o sile.