Efešanima

2 te oven ponizna, blaga, strpljiva, te podnosinen jekh jekhe mangipaja, 3 den sa tumendar te ićeren o jekhipe, kova isi tumen sebepi o sveti duh, ađahar so arakhena o mir kova povezini tumen. 4 Jekh tano telo hem jekh duh, sar soj tani hem jekh nada koja dobinđen ked o Devel vićinđa tumen. 5 Jekh tano o Gospod, jekh vera hem jekh krštenje. 6 Jekh tano o Devel hem o Dad ando sarine, kova tano upro sarinende hem delujini prekalo sare hem ano sare. 7 Svakonese amendar tano mothovdo o bizaslužimo šukaripe, ađahar sar so o Isus podelinđa odova dar. 8 Odolese tano phendo: „Ked ukljilo upre, legarđa e zarobljenikonen hem dinđa e manušen sar dar.“ 11 Hem dinđa disave te oven apostolija, disave te oven prorokija, disave te oven propovednikija andi šukar vest, disave te oven pastirija hem učiteljija, 12 te šaj te sikaven okolen soj tane sveta, te šaj te služinen averenđe hem te zorjaćeren e Hristeso telo, 13 đi sare na ovaja ko jekhipe ki vera hem đi sare na penđaraja šukar e Devlese Ćhave, đi na ovaja bare manuša, zrela sar o Hrist. 14 Odolese ma te ova pana tikne ćhave, sose okola so šunena razna hovavne sikljoviba ando manuša kola prevarinena averen, tane sar o čamco ko more kole i bavlal hem o talasija fordena akari-uduri. 15 Naprotiv, te ićera amen ko ćaćipe hem o mangipe nek pomožini amen ko sa te ava đi i zrelost, sar bi ovaja sar okova kova tano o šero, a odova tano o Hrist. 16 Sebepi oleso, celo telo tano šukar povezimo hem sa olese delija složno ćerena, sose svako zglob kova povezini len ispunini odova sose tano ćerdo. Ked svako deo ćerela pi uloga, odova pomožini o telo te barjol, kova kokri pes izgradini ko mangipe. 18 Olengi godi tani ki tomina hem on na ka dobinen o životi kova dela o Devel odolese so on kokri na mangena te đanen hem odolese soj tane olenge vile neosetljiva. 19 Našalđe svako moralno osećaj, mukhlje pe te ćeren odova soj tano lađavo, te šaj pohlepno te ćeren sa soj melalo. 22 Sikavde hijen te huljaven i purani ličnost, upri koja utičinđa odova sar živinđen angleder hem upri koja utičinena o lošna želje. 23 Valjani hem ponodri te meninen o način sar razmislinena 24 hem te uraven i nevi ličnost koja tani ćerdi premali Devlesi volja koja tani ćaće pravedno hem verno. 25 Odolese, akana ked cidinđen tumendar o hovajbe, sare vaćeren o ćaćipe jekh jekhese, sose hijam o delovija ando isto telo hem zavisinaja jekh jekhestar. 26 Ako holjanena, ma grešinen. Ma mukhen te nakhel o dive, a tumen pana te oven holjame, 27 Ma mukhen than e Bengese. 28 Ko ćorđa, više te na ćorel, nek ovel bućarno hem nek pošteno ćerel buti pe vastencar, te šaj te del diso okolese kova nane le. 29 Nisavo ružno lafi te na ikljol ando tumaro muj. Vaćeren samo odova soj tano šukar te šaj te zorjaćeri averen ked valjani hem te pomožini okolenđe so šunena. 31 Ciden tumendar sa i ogorčenost, i holi, o gnev, o pištiba, o pogrdno govor hem sa aver soj tano lošno. 32 Oven šukar jekh premalo avereste, samilosna hem ando vilo oprostinen jekh jekhese sar so o Devel prekalo Hrist ando vilo oprostinđa tumenđe.