2. Samuilova

24 E Sauleso unuko, o Mefivostej, alo te resel pe e kraljeja. Ov na thovđa pe pre, ni pe šeja hem mukhlja pese ćhora kotar odova dive ked đelo o kralj sa đi na irinđa pe ko mir. 25 Ked alo ko Jerusalim te resel pe e kraljeja, o kralj pućlja le: „Sose na pođinđan mancar, Mefivostej?“ 26 A ov odgovorinđa lese: „Gospodare, mo kraljo, tu đaneja so hijum sakato. Phenđum me slugase: ’Spremin maje e here te ukljav upro leste hem te pođinav e kraljeja‘, ama ov prevarinđa man. 27 Ov meljaćerđa mo anav anglo mo gospodari, o kraljo. Ama mo gospodari, mo kraljo, tano sar anđeo ando ćaćutno Devel. Odolese ćer sar so mislineja soj tano najšukar. 28 Mo gospodari, o kraljo, šaj hine te mudari sarinen ando me dadeso ćher, a tu ipak ćhivđan te sluga okolencar so hana ando to astali. Tegani sar šaj te rodav diso pobuter ando mo kraljo?“ 29 A o kralj phenđa lese: „Nane so te vaćera više odolestar. Tu hem o Siva ulaven i phuv.“ 30 Tegani o Mefivostej phenđa e kraljese: „Nek lel sa! Maje tano dovoljno so mo gospodari, mo kralj, irinđa pe ćhere ko mir.“ 32 O Varzelaj hine but phuro manuš. Hine le 80 berš. Sebepi so hine but barvalo, ov dinđa habe e kraljese sa đi o kralj hine ko Mahanaim. 33 O kralj phenđa e Varzelajese: „Pođin mancar prekali reka ko Jerusalim hem ka ha ando mo astali.“ 34 Ama o Varzelaj phenđa pe kraljese: „Pana kobor berša ka živinav, te šaj te đav e kraljeja ko Jerusalim? 35 Isi man 80 berš. Šaj li te haljovav soj tano šukar, a soj tano lošno? Šaj li to sluga te osetini savo tano o habe hem o pibe? Šaj li pana te šunav o glaso ando okola so đilabena? Tegani, sose to sluga te ovel ko pharipe me gospodarese, me kraljose?