Jovan
14 „Ma brininen tumen. Mothoven vera ko Devel hem koro mande. 2 Ko me Dadeso ćher isi but than živibase. Ked na bi ovela ađahar, bi phenava tumenđe. A akana đava te pripreminav tumenđe than. 3 Ked ka đav hem ked ka pripreminav tumenđe than, palem ka avav hem ka priminav tumen ko mo ćher, te šaj hem tumen te oven uduri kuri me hijum. 6 O Isus odgovorinđa lese: „Me hijum o drumo, o ćaćipe hem o životi. Samo prekalo mande šaj te avel pe ko Dad. 9 O Isus ko odova phenđa lese: „Odobor vreme hijum tumencar, a tu, Filipe, pana na penđarđan man? Ko dikhlja man, dikhlja hem e Dade. Sose tegani pheneja: ‘Mothov amenđe e Dade’? 10 Na verujineja li so me hijum ko jekhipe me Dadeja hem so mo Dad tano ko jekhipe mancar? Odova so me phenava na phenava kokri mandar, nego o Dad kova aćhola mancar ko jekhipe ćerela pi volja prekalo mande. 12 Ćaće phenava tumenđe, ko verujini ano mande, ka ćerel o buća kola hem me ćerava. Ka ćerel hem pana pobare buća, sose me đava ko mo Dad. 13 Hem so god rodena ko mo anav, ka ćerav odova, te bi proslavini pe o Dad prekalo Ćhavo. 16 Me ka zamolinav e Dade hem ov ka del tumen avere pomoćniko te ovel tumencar zauvek. 21 Ko prihvatini me zapovestija hem ićeri len, ov mangela man. A ko mangela man, ole ka mangel hem mo Dad. Hem me ka mangav le hem ka mukhav le te penđari man šukar.“ 23 O Isus odgovorinđa lese: Ako neko mangela man, ka ićeri pe ko me lafija hem mo Dad ka mangel le. Amen ka ka ava koro leste hem ka ova oleja. 26 A o pomoćniko, o sveti duh, kas o Dad ka bićhali ko mo anav, ka sikavi tumen ando sa hem ka podsetini tumen ko sa so phenđum tumenđe. 27 Aćhavava tumenđe mir, dava tumen mo mir. Me dava tumen mir savo o sveto na dela. Ma te ovel uznemirimo tumaro vilo hem ma te daral. 28 Šunđen so vaćerđum tumenđe: ’Me ka đav hem ka irinav man koro tumende.‘ Ako mangena man, tumen ka oven radosna so đava ko mo Dad, sose o Dad tano pobaro mandar. 30 Više na ka vaćerav but tumencar, sose avela akale svetoso vladari. Ov nane le vlast upro mande. 31 Ama, te šaj o sveto te đanel so mangava me Dade, me ćerava ađahar sar so mo Dad zapovedinđa maje. Ušten, te đa akatar.