Kološanima

3 Uvek zahvalinaja e Devlese, o Dad ando amaro Gospod o Isus Hrist, ked molinaja amen tumenđe, 4 sose šunđam asi tumari vera ko Hrist Isus hem aso mangipe kova isi tumen premalo sa o sveta 5 sebepi i nada so ka dobinen okova so tumenđe garavi pe ko nebo. Asi odija nada šunđen pana angleder, ked hine tumenđe objavimo o ćaćipe, avere lafencar i šukar vest 6 koja alji đi tumende. I šukar vest anela plod hem širini pe ko celo sveto, a odova ovela hem maškaro tumende ando okova dive ked šunđen hem šukar penđarđen o ćaćipe ando Devleso bizaslužimo šukaripe. 9 Odolese hem amen, kotar odova dive ked šunđam aso odova stalno molinaja amen tumenđe hem rodaja ando Devel šukar te penđaren olesi volja hem te ovel tumen pravo mudrost hem razumevanje kova o duh dela, 10 molinaja amen te ponašinen tumen ađahar sar so ponašinena pe okola so služinena e Jehovase hem te ćeren le te ovel bahtalo đi ćerena svako šukar delo hem pana pošukar penđarena e Devle. 11 Molinaja amen e Devlese hem te zorjaćeri tumen prekali pi slavno moć hem te del tumen snaga koja valjani tumenđe te šaj strpljivo hem radosno te istrajinen ko sa. 13 Ov ikalđa amen andi tomina hem prenesinđa amen ko kraljevstvo ando po manglo Ćhavo, 14 prekalo kaste hijam oslobodime e otkupninaja – oprostime tane amare grehija. 15 Ov tano slika ando Devel kova na dićhola, prvo kotar sa soj tano stvorimo. 16 Sose prekalo leste sa avera buća hine stvorime, sa soj tano ko nebo hem sa soj tano ki phuv, odova so dićhola hem odova so na dićhola, bizo obzir da li tane odola o prestolija ja o uprave ja o vladavine ja o vlastija. Sa tano stvorimo prekalo leste hem olese. 23 Ama, tumen mora te aćhoven ki vera hem te oven utvrdime ko temelji ko kova oj bešela hem postojana, te na ciden tumen kotar i nada koja dobinđen ked šunđen asi šukar vest, koja propovedinđa pe ki celo phuv. Me, o Pavle, uljum sluga andi odija šukar vest.