Jakovljeva

7 Odolese, phraljalen, oven strpljiva đi i Gospodesi prisutnost. Dikhen sar o zemljoradniko očekujini i phuv te anel o dragoceno plod hem strpljivo ađićeri o boršim ko jesen hem ko proleće. 8 Hem tumen oven strpljiva hem zorjaćeren tumaro vilo, sose tani paše e Gospodesi prisutnost. 10 Phraljalen, dikhen e prorokonen kola vaćerđe ko Jehovaso anav hem đan palo olengo primer ko odova sar te istrajinen ko pharipa hem te mothoven strpljenje. 11 Okolen so istrajinđe vićinaja bahtale. Šunđen asi Jovesi istrajnost hem đanena so o Jehova ko krajo ćerđa lese, đanena so o Jehova tano but samilosno hem milosrdno. 13 Da li neko maškaro tumende isi le disavo pharipe? Nek molini pe. Da li tano neko bahtalo? Nek đilabi o psalmija. 14 Da li tano neko nabormo maškaro tumende? Nek vićini e starešinen andi skupština, hem nek on molinen pe olese, nek makhen leso šero uljeja ko Jehovaso anav. 15 I molitva koja tani vaćerdi veraja ka saćari e naborme hem o Jehova ka vazdel le. A ako ćerđa disave grehija, ka ovel lese oprostimo. 16 Odolese, mothoven tumare grehija jekh jekhese hem molinen tumen jekh jekhese, te šaj te saćon. E pravednikosi molitva koja avela ando vilo isi la bari snaga. 17 O Ilija hine obično manuš sar amen, ama ked molinđa pe te na perel boršim, o boršim na pelo ki phuv trin berš hem šov masek. 19 Phraljalen, ako neko tumendar cidinđa pe ando ćaćipe, pa neko tumendar pomožini lese te irini pe 20 đanen so okova kova irinđa e grešniko ando oleso lošno drumo ka spasini odole manuše ando meribe hem ka ućhari but grehija.