2. Korinćanima

6 Sar olese saradnikija, palem molinava tumen te na propustinen te ispuninen i svrha ando Devleso bizaslužimo šukaripe kova priminđen. 2 Sose ov phenela: „Ko vreme andi mi milost uslišinđum tut, ko dive ando spasenje pomožinđum tut.“ Aće, akana tano o vreme andi milost! Aće, akana tano o dive ando spasenje! 3 Nikase na mangaja te da disavo razlog te spotaknini pe sose na mangaja niko te vaćeri diso lošno andi amari služba. 4 Nego ko sa mothovaja so služinaja e Devlese, ađahar so istrajinaja ko but kušnje, ko razna pharipa, ko ćororipe, 5 ked hijam marde, ko phanlipa, ked napadinena amen o nasilna manuša, ked ćeraja phari buti, ked na lela amen o sojbe, ked nane amen so te ha. 6 Mothovaja so hijam e Devlese sluge hem ađahar so živinaja čisto, postupinaja premalo odova so đanaja, hijam strpljiva, šukar, mukhaja te vodini amen o sveti duh, isi amen ćaćutno mangipe, 7 vaćeraja o ćaćipe, osloninaja amen ki Devlesi snaga. Mothovaja so hijam e Devlese sluge ađahar so akharaja o oružje andi pravednost ko desno hem ko levo vas, 8 ki slava hem ki lađ, ked kritikujinena amen hem ked hvalinena amen. O manuša dikhena amen sar prevarantija, ama amen vaćeraja okova soj tano ćaće, 9 sar okola kas na penđarena, ama ipak hijam penđarde, sar okola so merena, ama aće, ipak hijam đivde, sar okola kola tane kaznime, ama ipak na hijam mudarde, 10 sar okola soj tane ki žalost, a uvek tane bahtale, sar okola soj tane ćorore, a butenđe dena, sar okola so nane len ništa, ama ipak isi len sa. 11 Sa iskreno phenđam tumenđe, phraljalen ando Korint hem phravđam tumenđe amaro vilo. 12 Ko amaro vilo isi than tumenđe, ama ko tumaro vilo nane than amenđe. 13 Irinen amenđe ko isto način – phenava tumenđe sar me ćhavenđe – hem tumen pana pobuter phraven tumaro vilo. 14 Ma khuven ko isto jaram e manušencar kola na verujinena. Sose, so isi len zajedno i pravednost hem o bezakonje? Ja, so isi len zajedno i svetlost hem i tomnina? 15 Ja, so isi len zajedno o Hrist hem o Velijal? Ja, so isi len zajedno o verniko hem o neverniko? 17 „’Odolese ikljoven odothar hem odvojinen tumen olendar‘, phenela o Jehova, ’hem ma pipinen ništa soj tano melalo‘“, „hem me ka priminav tumen.“ 18 „’Hem ka ovav tumaro dad, a tumen ka oven me ćhave hem me ćhaja‘, phenela o Jehova, o Svemoćno.“