Matej

3 Đi bešlja ki Maslinsko gora, o učenikija alje kokri koro leste hem phenđe lese: „Vaćer amenđe ked ka ovel odova hem so ka ovel znak andi ti prisutnost hem ando krajo kotar akava sveto.“ 4 A o Isus odgovorinđa lenđe: „Pazinen neko te na prevarini tumen! 5 Sose but manuša ka aven ko mo anav hem ka vaćeren: ’Me hijum o Hrist!‘, hem buten ka prevarinen. 6 Ka šunen aso mariba hem vestija ando mariba. Pazinen te na daran, sose odova mora te ovel, ama tegani pana nane kraj. 7 „Ka uštel o narodo upro narodo hem o kraljevstvo upro kraljevstvo, ka oven bokhalipa hem zemljotresija ko razna thana. 8 Sa odova tano početak ando strašna pharipa. 9 „Tegani o manuša ka progoninen tumen hem ka mudaren tumen, hem sa o narodija ka mrzinen tumen sebepi mo anav. 10 But ka peren kotar vera hem ka izdajinen jekh jekhe hem ka mrzinen jekh jekhe. 11 Ka pojavinen pe but hovavne prorokija hem ka prevarinen buten. 12 O lošnipe ka barjol, odolese ko but đene o mangipe ka šudrol. 13 Ama ko istrajini đi o krajo, ka ovel spasimo. 14 Akija šukar vest ando Kraljevstvo ka propovedini pe ko celo sveto sar svedočanstvo sa e narodonđe, hem tegani ka avel o kraj. 15 „Odolese, ked ka dikhen so i gadost koja pustošini, kolatar vaćerđa o prorok Danilo, terđola ko sveto than (nek okova so čitini koristini i razboritost), 16 tegani okola kola ka oven ki Judeja nek našen ko gore. 17 Ko ka ovel ko krovo, ma te huljel te lel pe buća ando ćher. 21 Sose tegani ka ovel bari nevolja savi na hine kotar početak ando sveto pa sa đi akana, a više niked ni na ka ovel. 22 A ked na bi skratinena pe odola dive, niko na bi spasini pe. Ama, sebepi o birime ka skratinen pe odola dive. 24 Sose ka pojavinen pe o hovavne Hristija hem o hovavne prorokija. Ka ćeren bare znakija hem čudija sar bi cidena ando pravo drumo čak hem okolen soj tane birime. 30 Tegani ko nebo ka pojavini pe o znako ando manušikano Ćhavo hem sa o narodija ki phuv ka roven. Hem ka dikhen e manušikane Ćhave sar avela ko oblakija ko nebo silaja hem bare slavaja. 31 Ov ka bićhali pe anđelen ađahar so ka šunđol glasno i truba hem on ka ćeden olese birime kotar soštar strane ando sveto, kotar jekh krajo ando nebo đi aver. 33 Ađahar hem tumen, ked dikhena sa odova, te đanen so o manušikano Ćhavo tano paše, anglo udara. 34 Verujinen maje, akava naraštaj na ka nakhel đi na ovela sa odova. 36 „Niko na đanela ked ka avel odova dive hem o vreme, ni o nebeska anđelija ni o Ćhavo, nego samo o Dad. 37 Sar so hine ko Nojese dive, ađahar ka ovel i prisutnost ando manušikano Ćhavo. 38 Sar so ko odola dive angleder o Potop, halje, pilje, ženinđe pe hem lelje pese rome, sa đi na alo o dive ked o Noje khuvđa ki arka, 39 hem na obratinđe pažnja sa đi na alo o Potop hem sa uništinđa len, ađahar ka ovel i prisutnost ando manušikano Ćhavo. 40 Tegani duj manuša ka oven ki njiva: jekh ka ovel lendo, a o dujto aćhavdo. 41 Duj romnja ka melinen ko mlin: jekh ka ovel lendi, a i dujto aćhavdi. 42 Odolese, oven đangavde, sose na đanena ko kova dive avela tumaro Gospod. 44 Odolese hem tumen oven spremna, sose o manušikano Ćhavo avela ked ni najhari na ka ađićeren le! 45 „Koj tano o verno hem o razborito robo kas oleso gospodari ćhivđa upro pekle sluge, te del len hrana ko pravo vreme? 46 Bahtalo tano odova robo ako oleso gospodari, ked avela, arakhi le sar ćerela odova! 47 Verujinen maje, ka ćhivel le upro sa po imanje.