1. Samuilova
24 O Saul đelo palo Filisteja. Ked irinđa pe, phenđe lese: „O David garavi pe ki pustinja En-Gad.“ 2 Tegani o Saul ando celo Izrael birinđa 3 000 manušen hem pođinđa olencar te rodel e Davide hem olese manušen ko stene ko kola živinena o planinska buznja. 3 O Saul alo đi o torija ando bara kola hine uzo drumo. Othe hine jekh pećina hem ov khuvđa andre te olakšini pe. O David hem olese manuša garavđe pe andre ki pećina. 4 E Davidese phenđe olese manuša: „Akava tano o dive ked o Jehova phenela tuće: ’Ko te vasta mukhava te dušmane. Ćer oleja so mangeja.‘ “ O David ćorjale alo đi ko Saul hem ćhinđa o kraj ando oleso ogrtači. 5 Ama palo odova oleso vilo počminđa te osudini le odolese so ćhinđa jekh deo kotar e Sauleso ogrtači. 6 Tegani phenđa pe manušenđe: „Niked na bi šaj te vazdav mo vas upro Jehovaso pomazaniko hem te ćerav diso ađahar me gospodarese, sose ov tano e Jehovaso pomazaniko. Anglo Jehovase jaćha odova bi ovela baro lošnipe.“ 7 Odole lafencar o David terđarđa pe manušen hem na mukhlja len te napadinen e Saule. A o Saul ikljilo andi pećina hem đelo pe drumoja. 8 Palo odova o David ikljilo andi pećina hem vićinđa e Saule: „Mo gospodare! Mo kraljo!“ Tegani o Saul irinđa pe, a o David pelo ko koćija hem klaninđa pe lese đi ki phuv. 9 Palo odova phenđa e Saulese: „Sose šuneja e manušen kola phenena tuće: ’O David mangela te ćerel tuće baro lošnipe?‘ 10 Avdije te jaćhencar dikhljan so ki pećina o Jehova dinđa tut ko me vasta. Ama, ked phenđe maje te mudarav tut, me sažalinđum man upro tute hem phenđum: ’Na ka vazdav mo vas upro mo gospodari, sose ov tano e Jehovaso pomazaniko.‘ 11 Aće, mo dad, dikh o kotor ando to ogrtači ko mo vas. Ćhinđum jekh kotor ando to ogrtači, ama na mudarđum tut. Akana šaj te dikhe hem te haljove so na mangava te ćerav tuće nisavo lošnipe niti mangava te đav protiv tute. Na ćerđum tuće nisavo greh, a tu progonineja man hem mangeja te mudare man. 12 O Jehova nek sudini maškaro tute hem maškaro mande! O Jehova nek irini tuće aso sa so ćerđan maje, ama me na ka vazdav mo vas upro tute! 13 Sar so phenela jekh purani izreka: ’Ando lošno manuš avela o lošnipe‘, ama me na ka vazdav mo vas upro tute. 14 Palo kaste o izraelsko kralj pođinđa? Kas progonineja? Me hijum sar mulo đućel, sar obično buva. 15 O Jehova nek ovel amaro sudija! Ov ka sudini maškaro tute hem maškaro mande. Ov ka dikhel hem ka vodini mi parnica. Ka sudini maje hem ka ikali man ando te vasta.“ 17 Palo odova phenđa e Davidese: „Tu hijan popravedno mandar, sose tu maje ćerđan šukaripe, a me irinđum tuće lošnipaja. 18 Aće, kokri avdije phenđan so ćerđan maje šukaripe, sose na mudarđan man ked o Jehova dinđa man ko te vasta. 19 Ked o manuš resela pe dušmane, da li ka mukhel le mirno te đal pe drumoja? Nek o Jehova nagradini tut šukaripaja aso odova sar avdije postupinđan mancar. 20 Akana đanava so sigurno ka ove kralj hem so i kraljevsko vlast upro Izrael ka aćhol ko te vasta. 21 Odolese akana de sovel upro Jehova so na ka mudare me potomkon hem so na ka cide mo anav andi me dadesi loza.“ 22 O David dinđa lafi e Saulese. Tegani o Saul đelo ćhere, a o David pe manušencar irinđa pe ko than kuri garavđa pe.