1. Samuilova
26 Palo disavo vreme, o manuša kotar Zif alje ko Saul ki Gavaja hem phenđe lese: „O David garavi pe ko brego Ehela, premalo Gesimon.“ 2 O Saul birinđa 3 000 izraelska vojnikija hem đelo olencar ki pustinja Zif te rodel e Davide. 3 Phravđe o šatorija uzo drumo ko brego Ehela, premalo Gesimon. Tegani o David hine ki pustinja hem šunđa so o Saul alo palo leste ki pustinja. 4 Odolese bićhalđa e manušen te dikhen da li ćaće o Saul alo. 5 Palo odova o David đelo ko than kuri o Saul phravđa o šatorija hem dikhlja kaj suće o Saul hem o Avenir, e Nireso ćhavo, o zapovedniko andi vojska. O Saul suća ko maškar, a sa avera vojnikija suće okolo leste. 6 Tegani o David pućlja e Ahimelehe e Hetejco hem e Avisaje, e Serujake ćhave, e Joavese phrale: „Ko ka đal mancar ko Saul?“ O Avisaj phenđa: „Me ka đav tuvaja.“ 7 Ađahar o David hem o Avisaj račate alje đi i vojska. O Saul suća ko maškar, a o koplje hine uzo oleso šero, ćhivdo ki phuv. Oko leste hine o Avenir hem o vojnikija. 8 O Avisaj phenđa e Davidese: „Avdije o Devel ko te vasta dela tut te dušmane. Molinava tut, mukh man te khuvav le jekhvar e kopljeja. Na ka valjani duj putija te khuvav le.“ 9 Ama o David phenđa e Avisajese: „Ma mudar le. Sose ko šaj te vazdel po vas upro Jehovaso pomazaniko hem te aćhol bizi kazna?“ 10 O David pana phenđa: „Dava sovel upro Jehova, o đivdo Devel, o Jehova ka mudari le ja ka avel o dive ked ka merel ja ka đal ko maribe hem ka merel. 11 Anglo Jehovase jaćha bi ovela lošno te vazdav mo vas upro Jehovaso pomazaniko! Molinava tut, le akana o koplje kova tano uzo oleso šero hem o khoro panjese hem te đa amenđe akatar.“ 12 O David lelja o koplje hem o khoro panjese kola hine uzo Sauleso šero hem đelje. Niko na dikhlja len hem niko na uštilo. Sare suće sose o Jehova ćerđa te doljel len o hor sojbe. 20 Ma mukh mo rat te ovel ćhordo ki phuv dur kotar Jehovaso muj. Tu, kova hijan izraelsko kralj, pođinđan te rode jekh obično buva, progonineja man samći ked mangeja te astare e jarebica ko brdija.“ 21 Tegani o Saul phenđa: „Grešinđum. Irin tut, David, mo ćhavo, sose više na ka ćerav tuće lošnipe sebepi so mo životi hine tuće but vredno. Hijum le nerazumno hem ćerđum bari greška.“