2. Petrova

3 A najangleder, te đanen so ko poslednja dive ka pojavinen pe rugačija, kola ka maren muj, ka postupinen palo pekle želje 4 hem ka vaćeren: „Ov obećinđa so ka irini pe te ovel amencar, ama kaj tano akana? Odked amare phure mulje, sa tano isto sar so hine ko vreme ked o Devel ćerđa e manušen.“ 6 Odoleja odova sveto tegani hine uništimo ked hine potopimo panjeja. 7 A prekalo odova Lafi, o avdisutno nebo hem i phuv tane odredime aso uništenje e jagaja hem arakhena pe đi o dive ando sudo hem ando uništenje kotar o bezbožna manuša. 8 Ama, me mangle, ma bistren so jekh dive ko Jehova tano sar hiljada berša hem hiljada berša sar jekh dive. 9 O Jehova na harini te ćerel odova so phenđa, sar so disave mislinena so harini, nego tano strpljivo tumencar sose na mangela nijekh te merel, nego sare te pokajinen pe. 10 A e Jehovaso dive ka avel sar ćor. Tegani o nebo uzi but bari buka sig ka nakhel hem o buća ko nebo hem ki phuv ka raspadinen pe, a i phuv hem sa o buća kola ćerena pe koro late ka oven mothovde. 11 Sose sa odova ađahar ka raspadini pe, razmislinen odolestar save manuša valjani te oven. Nek tumare delija ovena sveta hem nek premalo lende dićhola so hijen odana e Devlese, 12 đi ađićerena hem isi tumen ki godi e Jehovaso dive, ked o nebo ka ovel uništimo ki jag, a o osnove ando sa ka topinen pe ando but baro tatipe. 13 Ama premalo leso obećanje, ađićeraja o nevo nebo hem i nevi phuv kuri i pravednost ka vladini. 14 Odolese, me mangle, sose sa akava ađićerena, den sa tumendar ov te arakhi tumen čista, bizi mana hem ko mir. 15 Uzo odova, o strpljenje ando amaro Gospod dikhen sar spasenje, sar so hem amaro manglo phral o Pavle pisinđa tumenđe premali mudrost koja hine lese dindi. 16 Ov odolestar vaćeri ko sa pe lila. Ama, koro lende isi mislija kola nane lokho te haljon pe, hem okola so na haljona šukar hem okola so nane len zorali vera irinena o lafija kola pisinena odothe, sar so ćerena hem avere bućencar kola tane ko Pismija hem ađahar kokri pese anena o uništenje. 17 Odolese tumen, me mangle, sose akava angleder već đanena, pazinen te na prevarinen tumen odola lošna manuša pe hovajbaja hem te na našaljen tumari odlučnost te aćhon verna.