2. Timoteju

2 Propovedin e Devleso lafi hem ćer odova revno, ko šukar vreme hem ko pharo vreme. Ukorin, prekorin, opomenin, a đi ćereja odova ov but strpljivo hem ov vešto đi sikaveja. 3 Sose ka ovel vreme ked o manuša na ka šunen o ispravno sikljovibe, nego premalo pe želje ka roden učiteljen kola ka vaćeren lenđe okova so mangena te šunen. 4 Više na ka mangen te šunen o ćaćipe nego ka šunen o hovavne priče. 5 A tu ov trezveno ko sa, istrajin ked doživineja lošnipe, propovedin i šukar vest, potpuno ćer ti služba. 6 Me hijum sar o prinos ando vino kova ćhorela pe ko oltari hem paše tano o vreme ando mo oslobođenje. 7 Šukar borinđum man, i trka prastandiljum đi o krajo, i vera arakhljum. 10 Sose o Dimas aćhavđa man odolese so manglja o buča soj tane ko sveto hem đelo ko Solun. O Kriskent đelo ki Galatija, a o Tit ki Dalmacija. 11 Samo o Luka tano mancar. Le e Marko tuvaja, sose but pomožini man ki služba. 13 Ked ka ave, ana maje moklo ogrtači kova mukhljum ki Troda ko Karp, a ana maje hem o svitkija, a posebno o pergamentija. 17 Ama, o Gospod hine mancar hem zorjaćerđa man te bi i šukar vest prekalo mande potpuno propovedini hem te bi sa o narodija šunena odija vest. Hem hijum le ikaldo ando e laveso muj. 18 O Gospod ka ikalji man ando svako lošnipe hem ka arakhi man te ovav ko oleso nebesko kraljevstvo. Olese nek ovel i slava večno. Amin.