Luka

2 Ko odova vreme, o car Avgust zapovedinđa sa o manuša te popisinen pe. 2 (Odova hine prvo popis kova hine ćerdo đi o Kvirinije hine namesnik ki Sirija.) 3 Sare đelje ko popis, svako ki pi diz. 4 Ađahar hem o Josif, andi galilejsko diz Nazaret, pođinđa ki Judeja, ki diz ki koja o David bijandilo, ko Vitlejem, sose ov hine andi e Davidesi loza. 5 Pođinđa ko popis e Marijaja, koja već hine dindi olese hem pana hari valjanđa te bijani. 6 Đi hine othe, alo o vreme oj te bijani. 7 Hem bijanđa ćhave, pe prvone, paćarđa le hem ćhivđa le ko than kuri hana o životinje, sose ki gostionica na hine than olenđe. 8 Ko odova than disave pastirija hine avrijal hem raćate arakhlje pe bakren. 9 Ando jekh puti e Jehovaso anđeo terdilo anglo lende hem e Jehovasi slava svetlinđa okolo lende hem on but darandilje. 10 A o anđeo phenđa lenđe: „Ma daran! Aljum te mothovav tumenđe i šukar vest koja ka anel baro bahtalipe sa e manušenđe. 11 Avdije ki Davidesi diz bijandilo o spasitelj – o Hrist, tumaro Gospod. 12 Aće sar ka penđaren le: ka arakhen e ćhave paćardo hem ćhivdo ko than kuri hana o životinje.“ 13 Ando jekh puti alje but anđelija kola hvalinđe e Devle hem vaćerđe: 14 „Nek ovel hvalimo o Devel kova tano upre ko nebo, a ki phuv nek ovel mir maškaro manuša kola tane pali olesi volja.“ 15 Ked o anđelija đelje olendar hem ked irinđe pe ko nebo, o pastirija phenđe jekh jekhese: „Hajde te đa ko Vitlejem te dikha odova so o Jehova mothovđa amenđe.“ 16 Sigate đelje hem arakhlje e Marija hem e Josife e ćhaveja kova hine ćhivdo ko than kuri hana o životinje. 17 Ked dikhlje odova, vaćerđe sa so o anđeo phenđa lenđe e ćhavestar. 18 Sare kola odova šunđe hine oduševime odoleja so o pastirija phenđe lenđe, 19 a i Marija arakhlja sa odola lafija ko po vilo hem razmislinđa olendar. 20 Palo odova o pastirija irinđe pe hem hvalinđe e Devle sebepi sa odova so šunđe hem so dikhlje, sose sa ulo ađahar sar so hine lenđe phendo. 21 Palo ofto dive, ked alo o vreme te obrezini pe o ćhavo, dinđe le anav Isus, sar so o anđeo phenđa pana angleder so i Marija aćhilji khamni. 22 Ked hine o vreme aso obredno čistibe premalo Mojsijeso zakon, anđe le ko Jerusalim anglo Jehova, 23 sar soj tano pisimo ko Jehovaso zakon: „Svako prvenco nek ovel posvetimo e Jehovase.“ 24 Dinđe žrtva sar so hine pisimo ko Jehovaso zakon: „Duj grlice ja duj terne golubija.“ 25 Ko Jerusalim živinđa jekh pravedno hem pobožno manuš kova vićinđa pe Simeon. Ov ađićerđa o vreme ked o Jehova ka utešini e izraelsko narodo hem o sveti duh hine upro leste. 26 Prekalo sveti duh hine lese mothovdo so na ka merel sa đi na dikhela e Jehovase Pomazaniko. 27 Legardo duhoja, o Simeon alo ko hram. Ked o roditeljija anđe e tikne Isuse te ćeren o obred kova rodinđa pe premalo Zakon, 28 lelja le ki angalja, počminđa te hvalini e Devle hem phenđa: 29 „Gospode, tu kova hijan Najbaro, sar so obećinđan, akana to rob šaj mirno te merel. 30 Sose me jaćha dikhlje okole prekalo kaste ka ane o spasenje, 31 okole kas tu bićhalđan hem akana dikhena le sa o narodija. 32 Ov ka ovel svetlo kova cidela i tomnina ando narodija hem ov ka ovel slava ando to narodo, o Izrael.“ 33 A oleso dad hem i daj hine oduševime odoleja so o Simeon phenđa olestar. 34 O Simeon blagoslovinđa len, a olese dajaće e Marijaće phenđa: „Sebepi akava ćhavoro but đene ko Izrael ka peren hem ka ušten hem but đene ka vaćeren protiv oleste, iako o Devel ka mothovi e manušenđe znakija soj tano oleja, 35 te bi dikhela pe soj tano butenđe ko vilo (a tut o mač ka posavi ki duša).“ 36 Ko odova vreme živinđa i proročica Ana, e Fanuilesi ćhaj, ando Asireso pleme. Oj hine ko phure berša. Ked lelja pese rome, živinđa oleja efta berš, 37 a palo odova živinđa sar udovica. Oj hine la 84 berš hem uvek đelji ko hram, dive hem rat služinđa e Devlese ađahar so postinđa hem molinđa pe ando vilo. 38 Ko odova trenutko oj alji koro lende hem počminđa te zahvalini pe e Devlese hem te vaćeri ando ćhavo sarinenđe kola ađićerđe o Jerusalim te ovel oslobodimo. 39 Ked o Josif hem i Marija ćerđe sa so rodela e Jehovaso zakon, on irinđe pe ki Galileja ki pi diz, ko Nazaret. 40 A o ćhavo barilo hem hine sa pozoralo, napredujinđa ki mudrost hem hine le e Devlesi naklonost. 41 Oleso dad hem olesi daj svako berš đelje ko Jerusalim te slavinen i Pasha. 42 Ked hine le 12 berš, sar uvek, on đelje ko Jerusalim te slavinen o prazniko. 43 Palo prazniko pođinđe ćhere, ama o Isus aćhilo ko Jerusalim, a olese roditeljija na dikhlje odova. 44 On mislinđe so ov tano maškaro avera putnikija. Tek palo jekh dive sar putujinđe, počminđe te roden le maškari familija hem maškaro okola kas đanđe. 45 Sebepi so na arakhlje le, irinđe pe ko Jerusalim hem ko sa o thana rodinđe le. 46 Palo trin dive arakhlje le ko hram sar bešela maškaro učiteljija, sar šunela len hem pućela len but buća. 47 Sare kola šunđe le hine oduševime odoleja sar odgovorini hem kobor buća haljola. 48 Ked dikhlje le olese roditeljija, čudinđe pe. Olesi daj phenđa lese: „Mo ćhavo, sose ćerđan amenđe odova? To dad hem me but brininđam amen đi na arakhljam tut.“ 49 A ov phenđa lenđe: „Sose rodinđen man? Na đanđen li so valjani te ovav ko me Dadeso ćher?“ 50 Ama on na haljilje okova so ov phenđa lenđe. 51 Ov irinđa pe olencar ko Nazaret hem hine lenđe poslušno. Olesi daj arakhlja sa odola lafija ko po vilo. 52 O Isus barjola hine hem ulo sa pomudro, hem o Devel hem o manuša but manglje le.