Matej

1 Akija tani i knjiga ando Isuse Hristeso životi, kova alo ando David, kova alo ando Avraham: 2 E Avrahamese bijandilo o Isak, e Isakese bijandilo o Jakov, e Jakovese bijandilje o Juda hem olese phralja, 6 E Jesejese bijandilo o kralj David. E Davidese e Urijasi romni bijanđa e Solomone, 18 Ked bijandilo o Isus Hrist hine ađahar: Ko vreme ked olesi daj i Marija hine verimi e Josifeja, angleder so venčinđe pe, aćhilji khamni prekalo sveti duh. 19 Sebepi so olako vereniko, o Josif, hine pravedno manuš hem na manglja te lađaćeri la anglo sarinende, hine le ko plani ćorjalje te rumini i veridba. 20 Ama palo odova so razmislinđa odolestar, alo lese ko suno e Jehovaso anđeo hem phenđa lese: „Josif, tu kova hijan e Davideso ćhavo, ma dara te le e Marija romnjaće, sose oj aćhilji khamni prekalo sveti duh. 21 Oj ka bijani murše, a tu de le anav Isus, sose ov ka spasini pe narodo ando olenge grehija.“ 22 Sa akava ulo te bi ispunini pe okova so o Jehova phenđa prekalo po proroko: 23 „Aće, i ćhaj ka aćhol khamni hem ka bijani murše hem ka del le anav Emanuilo“, so značini „o Devel tano amencar“. 24 Ked o Josif uštilo ando sojbe, ćerđa ađahar sar so phenđa lese e Jehovaso anđeo hem lelja e Marija te ovel olesi romni. 25 Ama na suća olaja sa đi na bijanđa e ćhave. Hem dinđa le anav Isus.