Matej

2 Palo odova so o Isus bijandilo ko Vitlejem, ki Judeja, ko vreme ando kralj Irod, o astrologija ando Istok alje ko Jerusalim 2 hem pućlje: „Kaj tano o judejsko kralj kova akana sigende bijandilo? Dikhljam olesi ćereni ked hijam le ko Istok, hem aljam te poklonina amen olese.“ 3 Ked o kralj Irod šunđa odova, but hine uznemirimo, a hine uznemirimo hem celo Jerusalim. 4 Ov ćedinđa sa e svešteničko poglavaren hem okolen so penđarena o Zakoni hem pućlja len kaj valjani te bijanđol o Hrist. 5 On phenđe lese: „Ko Vitlejem, ki Judeja, sose o proroko ađahar pisinđa: 6 ’A tu, Vitlejeme, kova hijan ki Judasi phuv, sigurno na hijan najnevažno diz ko jaćha ando Judase namesnikija, sose tutar ka ikljol o vođa, kova ka ovel pastiri me narodose, e Izraelese.‘ “ 7 Tegani o Irod ćorjalje vićinđa e astrologen hem olendar šunđa ked tačno pojavinđa pe odija ćereni. 8 Palo odova bićhalđa len ko Vitlejem hem phenđa lenđe: „Đan hem svugde pućen kaj tano o ćhavoro. Ked ka arakhen le, javinen maje, te đav hem me te pokloninav man olese.“ 9 Ked o kralj phenđa lenđe odova, on đelje. A i ćereni koja dikhlje ked hine ko Istok, đelji anglo lende sa đi na terdilji ko than kaj hine o ćhavoro. 10 Ked dikhlje odova, but hine bahtale. 11 Khuvđe ko ćher hem dikhlje e ćhavore pe dajaja, e Marijaja. Pokloninđe pe lese đi ki phuv, a palo odova ikalđe o vredna buća kola hine len hem dinđe le: zlato, tamjan hem smirna. 12 Ama sebepi so o Devel ko suno upozorinđa len te na irinen pe ko Irod, đelje ki pi phuv avere drumoja. 13 Ked đelje, e Josifese alo ko suno e Jehovaso anđeo hem phenđa lese: „Spremin tut, le e ćhave hem olese daja, hem naš ko Egipat. Aćhov uduri sa đi na phenava tuće te irine tut, sose o Irod ka rodel e ćhave te mudari le.“ 14 Ađahar o Josif spreminđa pe hem isto odija rat pođinđa e ćhaveja hem olese dajaja ko Egipat. 15 Uduri aćhilo sa đi na mulo o Irod hem ađahar ispuninđa pe okova so o Jehova phenđa prekalo po proroko: „Ando Egipat vićinđum me ćhave.“ 16 Ked o Irod dikhlja so o astrologija prevarinđe le, but holjanđa hem bićhalđa e manušen ko Vitlejem hem ko sa o okolna thana te mudaren sa e muršen đi o duj berš. Odova naredinđa premalo okova so o astrologija phenđe ando vreme ked pojavinđa pe i ćereni. 17 Tegani ispuninđa pe okova so hine phendo prekalo proroko Jeremija: 18 „Ki Rama šundilo o glaso, but baro pištibe hem baro rojbe. Odija hine i Rahela koja runđa palo pe ćhave hem niko naštine te utešini la, sose on na hine više olaja.“ 19 Ked o Irod mulo, đi o Josif hine ko Egipat, alo lese ko suno e Jehovaso anđeo 20 hem phenđa lese: „Spremin tut hem pođin e ćhaveja hem olese dajaja ki izraelsko phuv, sose mulje okola so manglje te mudaren e ćhave.“ 21 Ađahar ov spreminđa pe hem irinđa pe ki izraelsko phuv e ćhaveja hem olese dajaja. 22 Ama ked šunđa so o Arhelaj vladini sar kralj ki Judeja, ko than pe dadeso, e Irodeso, darandilo te đal uduri. A hem o Devel ko suno upozorinđa le hem odolese đelo ki Galileja. 23 Ked đelo uduri, aćhilo te živini ki diz koja vićini pe Nazaret hem ađahar ispuninđa pe okova so phenđe o prorokija: „Ka vićini pe Nazarećanin.“