Jovan

8 12 Tegani o Isus palem vaćerđa olencar hem phenđa: „Me hijum o svetlo e svetoso. Ko god sledini man, na ka phirel ki tomnina, nego ka ovel le o svetlo ando životi.“ 16 Čak hem ako sudinava, mo sud tano pravedno, odolese so na hijum kokri nego mancar tano o Dad kova bićhalđa man. 28 Odolese o Isus phenđa: „Ked ka mudaren e manušikane Ćhave ko stubo, tegani ka đanen ko hijum me hem so ništa na ćerava kokri mandar, nego vaćerava odova so mo Dad sikavđa man. 29 Okova kova bićhalđa man mancar tano. Na mukhlja man kokri, sose me uvek ćerava odova so ov mangela.“ 31 Tegani o Isus phenđa e Judejcenđe kola verujinđe ano leste: „Ako ka ićeren tumen ko me sikljoviba, ćaće hijen me učenikija, 32 hem ka penđaren o ćaćipe hem o ćaćipe ka oslobodini tumen. 36 Odolese, ako o Ćhavo oslobodini tumen, tegani ćaće ka oven slobodna. 42 Tegani o Isus phenđa lenđe: „Ked bi o Devel ovela tumaro Dad, tumen bi mangena man, sose o Devel bićhalđa man hem sebepi oleso hijum akate. Me na aljum kokri mandar, nego ov bićhalđa man. 44 Tumaro dad tano o Beng hem mangena te ćeren sar so tumaro dad mangela. Ov tano okova so mudari e manušen kotar početko hem na aćhilo ko ćaćipe, sose ano leste nane o ćaćipe. Ked hovavi, mothovi savo tano, sose ov tano hovavno hem o dad ando hovajbe. 45 A me vaćerava tumenđe o ćaćipe, hem odolese na verujinena maje. 46 Ko tumendar šaj te dokažini so ćerava greh? A ako vaćerava o ćaćipe, sose na verujinena maje? 47 Okova kaso dad tano o Devel, šunela odova so o Devel phenela. Ama tumen na šunena sose o Devel nane tumaro dad.“ 56 Tumaro dad o Avraham but radujinđa pe ki nada so ka dikhel mo dive. Ov dikhlja le hem radujinđa pe.“ 58 O Isus phenđa olenđe: „Ćaće vaćerava tumenđe, me hijum le angleder so bijandilo o Avraham.“ 59 Tegani lelje bara te forden upro leste, ama o Isus garavđa pe olendar hem ikljilo ando hram.