2. Letopisa

32 Palo odova so o Jezekija ćerđa sa odola delija kolencar mothovđa soj tano verno e Devlese, alo o Senahirim, o kralj andi Asirija, hem napadinđa i Juda. Opkolinđa o dizja, manglja te peravi olenge zidija hem te osvojini len. 2 Ked o Jezekija dikhlja so o Senahirim alo hem so mangela te ratujini protiv o Jerusalim, 3 rodinđa savet ando pe knezija hem ratnikija hem odlučinđa te ućhari o izvorija ando pani kola hine avrijal andi diz hem on složinđe pe oleja. 4 But manuša ćedinđe pe hem ućharđe sa o izvorija ando pani hem o potok kova hine ko odova than, hem vaćerđe: „Sose o asirska kraljija te arakhen odobor pani ked ka aven?“ 5 O Jezekija dinđa sa pestar te popravini o zido kova pelo hem ćerđa kule upro leste, a avrijal ćerđa aver zido. Popravinđa o Milon ki Davidesi diz hem ćerđa but oružje hem štitija. 6 Ćhivđa e vojno zapovednikonen upro narodo hem ćedinđa len ko trg uzo e dizjake udara, hem zorjaćerđa len akale lafencar: 7 „Oven hrabra hem zorale. Ma daran ando asirsko kralj hem ando sa o manuša kola tane oleja, sose amare isi pobuter nego olenge. 8 Ov oslonini pe ki manušengi snaga, a amencar tano o Jehova, amaro Devel, te pomožini amen hem te vodini amare bitke.“ Hem o narodo ohrabrinđa pe ked šunđa e Jezekijase lafija, kova hine kralj ki Juda. 25 Ama o Jezekija na mothovđa so hine zahvalno aso šukaripe kova hine lese ćerdo, sose oleso vilo ulo oholo. Odolese o Devel holjanđa upro leste, a hem upri Juda hem upro Jerusalim.