Jov
1 Ki phuv Uz, živinđa jekh manuš kova vićinđa pe Jov. Odova manuš hine verno hem pravedno, darandilo ando Devel hem cidinđa pe ando lošnipe. 2 Bijandilje lese efta ćhave hem trin ćhaja. 3 Hine le bari stoka, 7 000 bakre, 3 000 kamile, 1 000 guruva hem 500 hernja hem but sluge. Hine najbarvalo manuš maškaro sa o manuša kola bešlje ko Istok. 4 Olese ćhave ćerđe gozbe, svako ko po ćher ko isto dive. Vićinđe pe trine phenjen te han hem te pijen olencar. 5 A ked bi nakhena o dive andi gozba, o Jov bi vićini len koro peste te posvetini len. 6 Alo o dive ked o ćhave kotar pravo Devel alje anglo Jehova. Maškaro okola so ćedinđe pe hine hem o Satana. 7 Tegani o Jehova pućlja e Satana: „Kotar aveja?“ A o Satana odgovorinđa e Jehovase: „Nakhljum i phuv hem dikhljum.“ 8 O Jehova phenđa e Satanase: „Da li dikhljan me sluga, e Jove? Nijekh ki phuv nane sar oleste. Ov tano pravedno manuš, verno e Devlese, kova darala ando Devel hem cidela pe ando lošnipe.“ 9 A o Satana odgovorinđa e Jehovase: „Zar o Jov darala ando Devel bizo razlog? 10 Zar tu na arakheja ole, olese porodica hem sa so isi le? Blagoslovinđan sa o buća so ćerđa pe vastencar hem olesi stoka ulji but ki phuv. 11 Ama, akana pružin to vas hem le olestar sa so isi le, hem ka dikhe so ka vaćeri lošna buća tutar.“ 12 Tegani o Jehova phenđa e Satanase: „Aće, sa so isi le tano ko te vasta. Samo ole ma zadin!“ Ađahar o Satana đelo kotar Jehova. 13 Jekh dive, đi e Jovese ćhave hem olese ćhaja halje hem pilje vino ko ćher ando po najphureder phral, 14 ko Jov alo jekh sluga hem phenđa lese: „Đi o guruva orinena hine i phuv, a o hernja hana hine uzo lende, 15 o Saveja napadinđe amen hem ćorđe len, a e slugen mudarđe mačeja. Me jedino uspinđum te našav te javinav tuće odova.“ 16 Đi ov pana vaćerđa, alo hem aver hem phenđa: „I jag ando Devel alji kotar nebo hem tharđa e bakren hem e slugen. Samo me uspinđum te našav te phenav tuće odova.“ 17 Đi ov pana vaćerđa, alo hem o trito hem phenđa: „O trin čete ando Haldejcija alje hem napadinđe amen. Ćorđe o kamile, a e slugen mudarđe mačeja. Samo me uspinđum te našav te phenav tuće odova.“ 18 Đi ov pana vaćerđa, alo hem o štarto hem phenđa: „Te ćhave hem te ćhaja halje hem pilje vino ko ćher kotar po najphureder phral. 19 Kotar jekhvar andi pustinja alji zorali bavlal hem khuvđa ko e ćherese štar uglija hem ađahar o ćher pelo upro te ćhave hem sare mulje. Samo me uspinđum te našav te phenav tuće odova.“ 20 Tegani, o Jov uštilo, pharavđa pe šeja, ćhinđa sa pe bala, pelo ki phuv, klaninđa pe e Devlese 21 hem phenđa: „Nango ikljiljum kotar me dajako vođi, nango hem ka irinav man ki phuv. O Jehova dinđa, o Jehova hem lelja. Nek e Jehovaso anav ovela hvalimo.“ 22 Iako sa odova doživinđa, o Jov na grešinđa niti phenđa diso lošno e Devlestar.