Isaija
3 O manuša mrzinđe le hem cidinđe pe olestar, hine manuš kova đanđa asi dukh hem aso nabormipe. O manuša irinđe po šero te na dikhen oleso muj. Na hine poštujimo hem mislinđam so na vredini ništa. 4 Ćaće, ov lelja sa amare nabormipa hem upro peste lelja amari dukh. A amen mislinđam so o Devel ćerela lese pharipa, so kaznini le hem mučini le. 5 Ama ov hine posavdo aso amare prestupija, hine phago aso amare grehija. Trpinđa i kazna sebepi amaro mir, hem sebepi olese rane amen hijam saćarde. 7 Mučinđe le, a ov dozvolinđa te mučinen le hem na vaćerđa nijekh lafi. Legarđe le sar ked legarena e bakre te ćhinen le. Sar o bakro kova na mukhela po glaso anglo okola so šišinena le, ađahar ov na phravđa po muj. 8 Sebepi o nepravedno suđenje, lendo tano oleso životi. Ko ka bavini pe e detaljencar ando oleso životi? Sose silaja tano ikaldo andi phuv e đivdengi. Sebepi o prestupija ando mo narodo dobinđa udarco. 9 Pripremimo tano lese o grobo maškaro zločincija hem parumo tano maškaro barvale, iako na ćerđa nisavo lošnipe hem iako ano oleso muj na hine prevara. 10 Ama e Jehovasi volja hine te phagel le, ov dozvolinđa te patini. Devla, ako deja oleso životi sar žrtva aso prestup, ov ka dikhel po potomstvo, but ka živini hem prekalo leste ka ćerel pe e Jehovasi volja. 11 Sebepi sa so nakhlja, ka dikhel o šukar buća ando po trud hem ka ovel zadovoljno odoleja. Mo pravedno sluga pe đandipaja buten ka legari đi i pravednost, hem ka lel upro peste olenge prestupija. 12 Odolese ka dav le oleso deo sar hem butenđe, hem ka delini po deo okolencar kola tane moćna, sose dinđa po životi hem mislinđe lestar soj tano grešniko. Ov akharđa o grehija ando but manuša hem borinđa pe aso prestupnikija.