1. Samuilova

6 Ked alje hem ked dikhlja e Elijave, phenđa ano peste: „Sigurno tano ov e Jehovaso pomazaniko.“ 7 Ama o Jehova phenđa e Samuilese: „Ma dikh ko odova sar izgledini hem kobor tano ućo, sose na birinđum ole. O Devel na dikhela odova so o manuš dikhela, sose o manuš dikhela odova so šaj jaćhencar te dikhel pe, a o Jehova dikhela odova soj tano ko vilo.“ 10 Tegani o Jesej anđa anglo Samuilo pe efta ćhaven, ama o Samuilo phenđa e Jesejese: „O Jehova na birinđa nijekhe olendar.“ 11 Ko krajo o Samuilo pućlja e Jeseje: „Da li tane akala sa te ćhave?“ A ov odgovorinđa: „Aćhilo pana o najtikno, ama ov arakhi e bakren.“ Tegani o Samuilo phenđa e Jesejese: „Bićhal nekas palo leste sose na ka beša te ha maro đi ov na avela.“ 12 O Jesej bićhalđa te đan palo leste. O ćhavo hine lolo, hine le šuže jaćha hem hine but šužo. O Jehova phenđa: „Ušti hem pomazin le, sose ov tano odova!“ 13 Tegani o Samuilo lelja i šing e uljeja hem pomazinđa le anglo sa olese phralja. Odova dive e Jehovaso duh alo upro David hem aćhilo upro leste. Palo odova o Samuilo đelo ki Rama. 14 E Jehovaso duho cidinđa pe ando Saul. Hem o Jehova mukhlja upro leste o lošno duho te mučini le. 18 Jekh sluga phenđa: „Dikhljum jekhe ando Jesejese ćhave kotar Vitlejem kova đanela šukar te bašali. Ov tano hrabro hem zoralo ratniko. Ov šukar vaćeri, šužo tano hem o Jehova tano oleja.“