Luka

7 Alo o Prazniko ando mare bizo kvasco, ked valjanđa te del pe i pashalno žrtva. 8 O Isus bićhalđa e Petare hem e Jovane hem phenđa lenđe: „Đan hem spreminen amenđe i pashalno večera.“ 9 On pućlje le: „Kaj mangeja te spremina la tuće?“ 10 Ov phenđa lenđe: „Ked ka khuven ki diz, ka resen jekhe manuše kova akhari o ćupo panjeja. Pođinen oleja hem khuven ko ćher kaj ka khuvel hem ov. 11 Hem phenen e domaćinese ando odova ćher: ’O učitelj pućela tut: „Kaj tani i soba e gostonenđe ki koja valjani te hav i pashalno večera me učenikonencar?“ ‘ 12 Ov ka mothovi tumenđe bari hem namestimi soba ko sprat. Uduri spreminen la.“ 13 On đelje hem arakhlje sa ađahar sar so phenđa lenđe hem spreminđe sa asi Pasha. 14 Ked alo o vreme, o Isus pe apostolencar bešlja ko astali. 15 Hem phenđa lenđe: „But mangljum te hav tumencar akija pashalno večera angleder te počminen me muke. 16 Sose phenava tumenđe, na ka hav la palem sa đi na ispunini pe ko Devleso Kraljevstvo sa okova so oj predstavini.“ 17 Hem lelja i čaša, zahvalinđa pe e Devlese hem phenđa: „Len akija čaša hem den jekh jekhese. 18 Sose phenava tumenđe, ando akana više na ka pijav vino sa đi na avela e Devleso Kraljevstvo.“ 19 Hem lelja o maro, zahvalinđa pe e Devlese, phaglja le, dinđa len hem phenđa: „Akava predstavini mo telo kova ka del pe tumenđe. Ćeren akava te setinen tumen upro mande.“ 20 Ađahar lelja hem i čaša pali večera hem phenđa: „Akija čaša predstavini o nevo savez kova temeljini pe ko mo rat kova ka ovel ćhordo tumenđe. 21 „Ama te đanen, mo izdajniko bešela mancar ko astali. 22 Sose sa odova soj tano pisimo ando manušikano Ćhavo ka desini pe lese, ama teško okole manušese kova ka izdajini le!“ 23 Tegani on počminđe te pućen pe maškaro peste ko bi olendar šaj te ćerel diso ađahar. 24 O učenikija počminđe hem te svađinen pe sebepi odova koj tano najbaro olendar. 25 Tegani o Isus phenđa lenđe: „O kraljija gospodarinena upro narodija hem okola so vladinena upro narodija tane penđarde sar okola so ćerena šukaripe averenđe. 26 Ama tumen ma oven asavke. Nego o najbaro maškaro tumende nek ovel sar najtikno, a okova kova predvodini nek ovel sar okova kova služini. 27 Sose koj tano pobaro, okova so bešela ko astali ja okova so služini? Nane li okova so bešela ko astali? A me hijum maškaro tumende sar okova so služini. 28 „Tumen aćhiljen mancar ko me kušnje. 29 Odolese me ćerava tumencar savez aso kraljevstvo, sar so mo Dad ćerđa savez mancar, 30 te han hem te pijen ando mo astali ko mo Kraljevstvo, te bešen ko prestolija hem te sudinen upro 12 izraelska plemenija. 31 „Simon, Simon, aće o Satana rodinđa te iskušini tumen sar ked o manuš odvojini o điv andi ljuspa. 32 Ama me celone vileja molinđum man tuće ti vera te na slaboni. A tu, ked ka irine tut, zorjaćer te phralen.“ 33 Tegani o Petar phenđa lese: „Gospode, spremno hijum tuvaja te đav hem ko phanlipe hem te merav tuvaja.“ 34 Ama ov phenđa: „Petar, phenava tuće, angleder so o bašno avdije ka đilabi, trin putija ka phene so na penđareja man.“ 35 Pana phenđa lenđe: „Ked bićhalđum tumen te propovedinen bizo pare, bizi torba hem bizo sandale, da li diso falinđa tumenđe?“ On phenđe: „Na.“ 36 Tegani phenđa lenđe: „Ama akana, ko isi le pare, nek lel peja, a isto ađahar ko isi le torba nek lel peja. Hem ko nane le mač, nek biknel po fistani hem nek ćinel le. 37 Sose phenava tumenđe so upro mande mora te ispunini pe okova soj tano pisimo: ’O manuša dikhlje upro leste sar jekh ando grešnikija.‘ Hem odola lafija ispuninena pe upro mande.“ 38 Tegani phenđe: „Gospode, akate isi amen duj mačija.“ A ov phenđa lenđe: „Dovoljno tano.“ 39 Palo odova ikljilo ando ćher, hem sar so uvek ćerđa, đelo ki Maslinsko gora, a o učenikija pođinđe oleja. 40 Ked alje uduri, phenđa lenđe: „Molinen tumen te na peren ko iskušenje.“ 41 Tegani durilo olendar odobor kobor otprilike šaj te fordel pe jekh bar, pelo ko koćija hem počminđa te molini pe: 42 „Mo Dad, ako mangeja, cide akija čaša mandar. Ama, ma te ovel mi volja, nego nek ovel tikli.“ 43 Tegani jekh anđeo alo kotar nebo hem zorjaćerđa le. 44 Sebepi so hine lese but pharo, nastavinđa te molini pe celone vileja. Oleso znoj ulo sar kapke ando rat kola perena hine ki phuv. 45 Ked završinđa e molitvaja, đelo đi o učenikija hem arakhlja len sar sovena sose na hine len više snaga sose hine žalosna. 46 Hem phenđa lenđe: „Sose sovena? Ušten hem molinen tumen te na peren ko iskušenje.“ 47 Đi pana vaćerđa, alje but manuša kas vodinđa o Juda, kova hine jekh ando dešuduj apostolija. Ov đelo ko Isus hem ćumudinđa le. 48 O Isus phenđa lese: „Judo, da li ćumudibaja izdajineja e manušikane Ćhave?“ 49 Ked okola so hine oleja dikhlje so ka ovel, phenđe lese: „Gospode, te napadina len mačeja?“ 50 A jekh olendar čak napadinđa e prvosveštenikose robe hem ćhinđa oleso desno kan. 51 Tegani o Isus phenđa: „Ma ćeren odova!“ Palo odova pipinđa e manušeso kan hem saćarđa le. 52 A e svešteničko poglavarenđe, e hramsko zapovednikonenđe hem e starešinenđe, kola alje te astaren le, phenđa: „Aljen e mačencar hem e kaštencar te astaren man, samći ked hijum razbojniko! 53 Svako dive hijum le tumencar ko hram hem na astarđen man. Ama akava tano tumaro trenutko hem vreme ked i tama vladini.“ 54 Tegani dolinđe le hem legarđe le odothar. Anđe le ko prvosveštenikoso ćher. A o Petar dural đelo palo leste. 55 Ko maškar ko dvoro o manuša tharđe i jag hem bešlje uzi jag, a hem o Petar bešlja olencar. 56 Ked bešlja uzi jag, jekh sluškinja dikhlja le hem phenđa: „Hem akava manuš hine oleja.“ 57 Ama ov na manglja te priznajini odova hem phenđa: „Romnije, na penđarava le.“ 58 Sigate palo odova dikhlja le jekh aver manuš hem phenđa: „Hem tu hijan jekh olendar.“ A o Petar phenđa: „Na, na hijum.“ 59 Ked nakhlja oko jekh o sati, jekh aver manuš uporno vaćerđa: „Ov sigurno hine oleja, sose ov tano Galilejco.“ 60 A o Petar phenđa lese: „Na đanava sostar vaćereja.“ Ko isto odova trenutko, đi ov pana vaćerđa, o bašno počminđa te đilabi. 61 Tegani o Gospod irinđa pe hem dikhlja e Petare, a o Petar setinđa pe so o Gospod phenđa lese: „Angleder so o bašno avdije ka đilabi, trin putija ka phene so na penđareja man.“ 62 Hem ikljilo avrijal hem but runđa. 63 O manuša kola arakhlje e Isuse počminđe te maren lese muj hem te khuven le. 64 Ućharđe leso šero hem vaćerđe: „Ako hijan proroko, vaćer ko khuvđa tut!“ 65 Hem on vaćerđe but lošna lafija protiv o Isus kolencar mothovđe so na poštujinena e Devle.