Matej

17 Ko prvo dive ko Praznik ando mare bizo kvasco o učenikija alje ko Isus hem pućlje le: „Kaj mangeja te spremina tuće i pashalno večera?“ 18 Ov phenđa: „Đan ki diz ko odova hem odova manuš hem vaćeren lese: ’O učitelj phenela: „Mo vreme tano paše. Ka slavinav i Pasha me učenikonencar ko to ćher.“ ‘ “ 19 Hem o učenikija ćerđe ađahar sar so phenđa lenđe o Isus hem spreminđe sa so valjanđa asi Pasha. 20 Ked pelji i rat, bešlja ko astali pe dešuduje učenikonencar. 21 Đi halje, phenđa: „Verujinen maje, jekh tumendar ka izdajini man.“ 22 Ked šunđe odova ulje but tužna, hem jekh palo avereste pućlje: „Gospode, te na hijum me odova?“ 23 Ov phenđa lenđe: „Ko macini o maro mancar ko ćaro, ov ka izdajini man. 24 Ćaće, o manušikano Ćhavo đala, sar soj tano pisimo olestar, ama pharo ka ovel okole manušese kova izdajini e manušikane Ćhave! Odole manušese bi ovela pošukar hić te na bijanđol hine.“ 25 O Juda, kova spreminđa pe te izdajini le, phenđa: „Učitelju, te na hijum me odova?“ Ov phenđa lese: „Tu kokri odova phenđan.“ 26 Đi halje, o Isus lelja o maro hem ked molinđa pe, phaglja le, dinđa pe učenikonenđe hem phenđa: „Len, han. Akava predstavini mo telo.“ 27 Lelja hem i čaša, zahvalinđa pe e Devlese hem dinđa len, vaćerindoj: „Sare pijen olatar, 28 sose akava predstavini mo ’rat ando savez‘, kova ka ćhorđol butenđe te šaj te oven oprostime o grehija. 29 Ama phenava tumenđe, ando akana na ka pijav ando akava vino sa đi o dive ked ka pijav tumencar o nevo vino ko Kraljevstvo ando mo Dad.“ 30 Palo odova so đilabđe o đilja kolencar hvalinđe e Devle, đelje ki Maslinsko gora. 31 Tegani o Isus phenđa lenđe: „Sarinengi vera akija rat ka slaboni, sebepi odova so ka ovel mancar, sose pisimo tano: ’Ka khuvav e pastire hem o bakre ando stado ka našen.‘ 32 Ama ked ka uskrsninav, ka đav ki Galileja hem uduri ka ađićerav tumen.“ 33 O Petar ko odova phenđa lese: „Ako sarinengi vera ka slaboni sebepi odova so ka ovel tuvaja, mi vera niked na ka slaboni!“ 34 O Isus phenđa lese: „Verujin maje, akija rat, angleder so o bašno ka đilabi, trin putija ka phene so na penđareja man.“ 35 O Petar phenđa lese: „Čak hem ako mora te merav tuvaja, niked na ka phenav so na penđarava tut.“ Ađahar phenđe hem sa avera učenikija. 36 Tegani o Isus alo pe učenikonencar ko than kova vićini pe Getsimanija hem phenđa lenđe: „Bešen akate đi me đava uduri te molinav man.“ 37 Lelja peja e Petare hem e Zevedejese duje ćhaven. Tegani dolinđa le but bari žalost hem nemir. 38 Ov phenđa lenđe: „But maje pharo. Aćhoven akate hem oven đangavde.“ 39 Đelo hari podur, pelo ko koćja, hem molinđa pe: „Mo Dad, ako šaj, nek nakhel man akija čaša. Ama ma te ovel sar so me mangava, nego sar so tu mangeja.“ 40 Ked irinđa pe ko pe učenikija arakhlja len sar sovena hem phenđa e Petarese: „Naštine li ni jekh sati te aćhon đangavde mancar? 41 Oven đangavde hem molinen tumen te na peren ko iskušenje. O duh tano ćaće spremno, ama o telo tano slabo.“ 42 Hem dujto puti đelo hem molinđa pe: „Mo Dad, ako šaj akija čaša te nakhel man, te na pijav olatar. Ama ako našti, nek ovel sar so tu mangeja.“ 43 Palem irinđa pe hem arakhlja len sar sovena, sose dolinđa len o sojbe. 44 Aćhavđa len, palem đelo hem trito puti molinđa pe isto lafencar. 45 Tegani irinđa pe ko pe učenikija hem phenđa lenđe: „Ko akava trenutko sovena hem odmorinena tumen! Aće, alo o vreme o manušikano Ćhavo te ovel dindo ko e grešnikonenge vasta. 46 Ušten, te đa. Mo izdajniko avela.“ 47 Đi pana vaćerđa, alo o Juda, kova hine jekh ando dešuduj, hem oleja but manuša kola hine len mačija hem kašta. Olen bićhalđe o sveštenička poglavarija hem o starešine ando narodo. 48 Oleso izdajniko phenđa olenđe kova znak ka del len: „Kas ka ćumudinav, odova tano. Ole dolen.“ 49 Hem odmah alo uzo Isus hem phenđa: „Zdravo, Učitelju!“ Palo odova ćumudinđa le. 50 O Isus phenđa lese: „Amala, sose hijan akate?“ Tegani alje hem dolinđe e Isuse. 51 Ama jekh ando okola so hine e Isuseja ikalđa o mač, napadinđa e prvosveštenikose robe hem ćhinđa oleso kan. 52 Tegani o Isus phenđa lese: „Irin o mač ko oleso than, sose sa okola so dolena pe ko mač, ka meren olestar. 53 Mislineja li so našti te rodav ando mo Dad akana te bićhali maje pobuter ando 12 legije ando anđelija? 54 Ama tegani sar ka ispunini pe o Lil, kaj pisini so ađahar mora te ovel?“ 55 Palo odova o Isus phenđa odole manušenđe: „Da li me hijum razbojniko, pa tumen leljen o mačija hem o kašta hem aljen te dolen man? Svako dive bešljum ko hram hem sikavđum e manušen, a tumen na dolinđen man. 56 A sa akava ulo te bi ispunini pe okova so o prorokija pisinđe.“ Tegani sa olese učenikija aćhavđe le hem našlje. 59 Đi sa odova trajinđa, o sveštenička poglavarija hem o celo Sinedrion rodinđe nesavi nepravedno optužba protiv o Isus, te bi šaj te mudaren le. 75 O Petar setinđa pe so o Isus phenđa lese: „Angleder so o bašno ka đilabi, trin putija ka phene so na penđareja man.“ Palo odova, ikljilo avrijal hem runđa sose hine but tužno.