Matej
24 Ked odova šunđe okola deš đene, holjanđe upro odola duj phralja. 25 Ama, o Isus vićinđa len koro peste hem phenđa lenđe: „Đanena so o vladarija gospodarinena upro narodija hem so o bare manuša isi len vlast upro lende. 26 A maškaro tumende ma te ovel ađahar. Nego ko mangela te ovel baro maškaro tumende, nek ovel tumenđe sluga, 27 hem ko mangela te ovel prvo maškaro tumende, nek ovel tumaro robo. 28 Sar so o manušikano Ćhavo na alo te služinen lese, nego alo te služini hem te del po životi sar otkupnina butenđe.“ 30 Duj korore manuša bešlje uzo drumo. Ked šunđe so o Isus nakhela, on vićinđe: „Gospode, e Davideso Ćhavo, smilujin tut upro amende!“ 31 O narodo phenđa lenđe te na vićinen, ama on pana poglasno vićinđe: „Gospode, e Davideso Ćhavo, smilujin tut upro amende!“ 32 Tegani o Isus terdilo, vićinđa len hem phenđa: „So mangena te ćerav tumenđe?“ 33 On odgovorinđe lese: „Gospode, nek phravđon amare jaćha te dikha.“ 34 O Isus sažalinđa pe upro lende hem pipinđa lenge jaćha, on odmah počminđe te dikhen hem đelje palo leste.