1. Kraljevima
3 Ov darandilo hem našlja te spasini po životi. Alo ki Virsaveja, koja tani ki Juda, hem uduri aćhavđa pe sluga. 4 Palo odova đelo ki pustinja, jekh dive phirđa, alo đi ko jekh kaš hem bešlja talo leste. Tegani počminđa te molini pe te merel: „Dosta maje! Jehova, le mo životi, sose na hijum ništa pošukar ando mekle pretkija.“ 5 Palo odova pašljilo hem lelja le o sojbe talo odova kaš. Ama, ando jekh puti jekh anđeo takinđa le hem phenđa lese: „Ušti te ha maro.“ 6 Ked dikhlja, uzo šero hine lese pogača koja hine ko žarija ando bara hem o krčag panjeja. Halja hem pilja hem palem pašljilo. 7 E Jehovaso anđeo alo pana jekh puti, takinđa le hem phenđa: „Ušti hem ha maro, sose ađićeri tut baro drumo.“ 9 Uduri khuvđa ki jekh pećina hem othe raćerđa. O Jehova phenđa lese: „So ćereja othe Ilija?“ 10 Ov odgovorinđa: „Revno služinđum e Jehovase, e Devlese, kova tano Komandanti upro sa o vojske. O Izraelcija aćhavđe to savez, peravđe te oltarija, a te prorokonen mudarđe mačeja. Samo me aćhiljum, a akana hem man mangena te mudaren.“ 11 Ama o Devel phenđa lese: „Ikljov hem terđov anglo Jehova ki akija gora.“ Hem o Jehova nakhlja uzo Ilija, a i zorali hem but bari bavlal ulavđa o gore hem phaglja o stene anglo Jehova, ama o Jehova na hine ani bavlal. Pali bavlal počminđa o zemljotres, ama o Jehova na hine ano zemljotres. 12 Palo zemljotres alji i jag, ama o Jehova na hine ni ki jag. Palo odova šundilo jekh tiho hem blago glaso. 15 Tegani o Jehova phenđa lese: „Đa hem irin tut ki pustinja uzalo Damask. Ked ka rese uduri, pomazin e Azaile te ovel kralj upri Sirija. 16 E Juje, e Nimsijese unuko, pomazin le te ovel kralj upro Izrael, a e Jeliseje, e Safatese ćhave ando Avel-Meol, pomazin le te služini sar proroko palo tute. 17 Okole kova ka našel ando Azaileso mač, ka mudari le o Juj, a okole kova ka našel ando Jujeso mač, ka mudari le o Jelisej. 18 A ko Izrael isi man pana 7 000 manuša kola na klaninđe pe e Valese hem na ćumudinđe le.“ 19 Ked đelo odothar, arakhlja e Safatese ćhave e Jeliseje sar orini. Anglo leste hine 12 parija guruva kola hine ćhivde ko jaram, a ov hine ko dešudujto. O Ilija alo koro leste hem ćhivđa lese po proročko ogrtači. 20 Tegani ov mukhlja e guruven hem prastandilo palo Ilija hem phenđa lese: „Molinava tut, mukh man te ćumudinav me dade hem me daja hem palo odova ka đav tuvaja.“ O Ilija odgovorinđa lese ko odova: „Đa, irin tut, te na ćhinavava tut ko odova?“ 21 Ađahar ov irinđa pe, lelja duje guruven hem dinđa len sar žrtva, a ko kašta ando plug hem jaram ćeravđa olengo mas hem dinđa e manušenđe te han. Tegani đelo e Ilijaja hem ulo oleso sluga.