2. Letopisa

26 Tegani celo narodo kotar Juda lelja e Ozija, kova hine le 16 berš, hem ćhivđa le te ovel kralj ko olese dadeso than, e Amasijaso. 2 Ov e Judaće irinđa o Elot hem obnovinđa le palo odova so o kralj mulo. 3 O Ozija hine le 16 berš ked ulo kralj hem vladinđa 52 berš ko Jerusalim. Olesi daj vićinđa pe Jeholija hem hine ando Jerusalim. 4 Ov ćerđa okova soj tano šukar anglo Jehovase jaćha, sar hem oleso dad, o Amasija. 5 Ov služinđa e Devlese đi hine đivdo o Zaharija, kova sikavđa le te daral ando ćaćutno Devel. Đi služinđa e Jehovase, e ćaćutne Devlese, ov blagoslovinđa le. 16 Ama ked ulo moćno, oleso vilo odobor ulo oholo so kokri pes igarđa ki propast. Grešinđa protiv o Jehova, pe Devlese, ked khuvđa ko e Jehovaso hram te tharel o kad ko kadiono oltari. 18 On suprotstavinđe pe e kraljese e Ozijase hem phenđe lese: „Na ismineja tu, Ozija, te thare o kad e Jehovase! Odova valjani te ćeren samo o sveštenikija, sose on tane e Aronese potomkija, o manuša kas o Devel posvetinđa. Ikljov ando svetilište, sose na hijan verno hem o Jehova, o Devel na ka mothovi tuće čast aso odova.“ 19 Tegani o Ozija, kova ko vas ićerđa i kadionica aso odova te del pe o kad, holjanđa. Ama, đi hine holjamo upro sveštenikija hem đi terdilo uzo kadiono oltari ko Jehovaso ćher, ikljilji lese guba ko ćekat anglo sveštenikija. 21 O kralj hine le guba sa đi na mulo, hem sebepi odova bešlja ko posebno ćher hem više na hine lese dozvolimo te đal ko Jehovaso ćher. Oleso ćhavo o Jotam upravinđa e kraljese dvoroja hem sudinđa e narodose.