Jovan

19 Tegani o Pilat naredinđa te legaren e Isuse hem te šibinen le. 2 O vojnikija khuvđe jekh venco ando kare hem ćhivđe le e Isusese ko šero, a palo odova uravđe le purpurno ogrtači. 3 Alje uzo leste hem phenđe lese: „Zdravo, kraljo ando Judejcija!“ Hem khuvđe le šamarke. 4 O Pilat palem ikljilo avri hem phenđa e Judejcenđe: „Aće, ikalava le anglo tumende te đanen so na arakhljum ništa aso so bi optužinava le.“ 5 Tegani o Isus ikljilo, ko šero hine le o venco ando kare hem upro leste hine o purpurno ogrtači. A o Pilat phenđa lenđe: „Aće o manuš!“ 6 Ked o sveštenička poglavarija hem o stražarija dikhlje le, ko sa o glaso vaćerđe: „Ko stub oleja! Ko stub oleja!“ A o Pilat phenđa olenđe: „Igaren le hem tumen ćhiven le ko stubo, sose me na arakhljum ništa aso so valjani te optužinav le.“ 7 O Judejcija ko odova phenđe lese: „Amen isi amen zakon hem premalo amaro zakon ov mora te merel, odolese so pese phenđa soj tano e Devleso ćhavo.“ 11 O Isus odgovorinđa lese: „Tu ne bi ovela tut nisavi vlast upro mande ako nane tuće dindi ando nebo. Odolese tano pobaro greh upro manuš kova predajinđa man tuće.“ 16 Tegani dinđa le olenđe, te ovel kovimo ko stubo. Ađahar on legarđe e Isuse. 17 Đi legarđa o stub ko kova valjanđa te ovel kovimo, alo ko than kova vićini pe o Than andi lobanja, kova ko hebrejski vićini pe Golgota. 18 Uduri kovinđe le ko stubo pana duje manušencar. O Isus hine maškaro lende. 26 Ked o Isus dikhlja pe daja hem uzo late pe učeniko kole posebno manglja, phenđa pe dajaće: „Aće to ćhavo.“ 27 Palo odova phenđa e učenikose: „Aće ti daj.“ Hem tegani o učeniko ljelja la ko po ćher. 28 Palo odova, sebepi so đanđa soj tano sa završimo, o Isus phenđa: „Trošalo hijum“, hem ađahar ispuninđa pe odova so pisini ko Lil. 30 Ked probinđa o šutlo vino o Isus phenđa: „Ćerđum sa so rodinđan mandar!“ Teljarđa po šero hem mulo. 34 nego jekh ando vojnikija kopljeja posavđa le talo rebrija hem odmah ikljilo o rat hem o pani. 38 Palo odova o Josif andi Arimateja, kova hine e Isuseso učeniko, ama odova garavđa ando Judejcija sose darandilo, pućlja e Pilate te mukhel le te huljavi e Isuseso telo kotar stubo. O Pilat phenđa so šaj te ćerel odova hem o Josif alo hem huljađa oleso telo kotar stubo.