Dela apostolska

8 O Savle ko po vilo složinđa pe olencar te mudaren le. Odova dive počminđa baro progonstvo protiv i skupština ko Jerusalim, hem odolese sare, osim o apostolija, đelje ki Judeja hem ki Samarija. 4 Okola kola đelje ko avera thana vaćerđe o šukar haberi, e Devleso lafi, kuri god nakhlje. 5 Ađahar o Filip đelo ki diz Samarija hem odothe počminđa te propovedini ando Hrist. 6 Ked o narodo šunđa e Filipe hem dikhlja o čudija kola ćerđa, sare pažljivo šunđe odova so vaćerđa. 12 Ama ked počminđe te verujinen e Filipese, kova vaćerđa i šukar vest ando Devleso Kraljevstvo hem ando Isuse Hristeso anav, krstinđe pe hem murša hem đuvlja. 14 Ked o apostolija ko Jerusalim šunđe so o manuša andi Samarija prihvatinđe e Devleso lafi, bićhalđe uduri e Petare hem e Jovane. 25 Ked temeljno propovedinđe hem vaćerđe e Jehovaso lafi, đelje ko Jerusalim hem drumal vaćerđe i šukar vest ko but gava ki Samarija. 26 A e Jehovaso anđeo phenđa e Filipese: „Spremin tut hem pođin ko jug, drumoja kova đala ando Jerusalim ki Gaza.“ (Odova drumo đala prekali pustinja.) 27 O Filip spreminđa pe hem pođinđa. Drumal reslja jekhe Etiopljanine, kova hine dvoranin ko baro položaj hem kova služinđa e kandakaće, e etiopsko kraljicaće. Ov brininđa pe ando kraljicako barvalipe. Ov hine ko Jerusalim te poklonini pe e Devlese. 28 Akana irinđa pe ćhere hem đi bešlja ko pe vorda, ko glaso čitinđa i knjiga ando prorok Isaija. 29 A o duh phenđa e Filipese: „Đa đi odola vorda.“ 30 O Filip prastandilo đi o vorda hem šunđa sar o Etiopljanin čitini i knjiga ando prorok Isaija hem pućlja le: „Da li haljoveja odova so čitineja?“ 31 Ov odgovorinđa lese: „Sar bi šaj ako neko na objasnini maje?“ Hem vićinđa e Filipe te ukljel ko vorda hem te bešel uzo leste. 32 A čitinđa akala lafija ando Lil: „Igarđe le sar e bakre ked ćhinela pe. Sar so o tikno bakro čutini anglo okova kova šišini le, ađahar ni ov na phravđa po muj. 34 O dvoranin tegani phenđa e Filipese: „Molinava tut, vaćer maje kastar o proroko vaćeri? Pestar ili averestar?“ 35 Tegani o Filip, počmindoj ando odola lafija kotar Lil, objavinđa lese i šukar vest ando Isus. 36 Đi ađahar putujinđe, alje đi ko disavo pani, a o dvoranin phenđa: „Aće o pani! So sprečini man te krstinav man?“ 38 Tegani zapovedinđa o vorda te terđon, hem o solduj khuvđe ko pani, o Filip hem o dvoranin, hem o Filip krstinđa le.