Otkrivenje

2 Tegani dikhljum e parne graste hem upro leste e jahače kova hine le luk. Hine lese dindi i kruna hem đelo te pobedini hem te anel i pobeda đi o krajo. 3 Ked o Bakro phravđa o dujto pečati, šunđum sar aver biće vaćeri: „Ava!“ 4 Hem dikhljum avere graste kova hine le loli boja. Oleso jahači dobinđa vlast te lel o mir kotar phuv te šaj o manuša te mudaren jekh jekhe. Dobinđa hem baro mač. 5 Ked o Bakro phravđa o trito pečati, šunđum sar o trito biće vaćeri: „Ava!“ Tegani dikhljum jekhe kale graste hem upro leste e jahače kova hine le vaga ko vas. 6 Hem šunđum diso sar glaso maškaro štar bića sar vaćeri: „I mera ando điv aso denar hem trin mere ando ječam aso denar! A o ulje hem o vino trošin pohari!“ 7 Ked o Bakro phravđa o štarto pečati, šunđum o glaso ando štarto biće sar vaćeri: „Ava!“ 8 Tegani dikhljum jekhe bledo graste hem upro leste e jahače kaso anav hine Meribe, a palo leste đelo o grobo. Hem dobinđe i vlast upro štarto deo andi phuv, te mudaren mačeja, bokhalipaja, nabormipaja hem zverijencar.