Postanak

5 O Lot kova putujinđa e Avrameja, hine le bakre, guruva hem šatorija. 6 Ama, i phuv na hine odobor bari te bi živinena ko jekh than, sose hine len odobor buća so našti hine te aćhon zajedno. 7 Odolese alo đi ki svađa maškaro Avramese hem e Lotese pastirija. (Tegani ki odija phuv živinđe o Hanancija hem o Ferezeja.) 8 O Avram phenđa e Lotese: „Molinava tut, ma te ovel svađa maškaro tute hem mande hem maškaro te pastirija hem me pastirija, sose hijam phralja. 9 Celo phuv tani anglo tute. Molinava tut, odvojin tut mandar. Ako tu ka đa levo, me ka đav desno, a ako tu ka đa desno, me ka đav levo.“ 10 Tegani o Lot dikhlja okolo peste hem dikhlja soj tani celo jordansko ravnica sa đi o Sigor pherdi panjeja hem soj tani sar e Jehovaso vrt, sar i egipatsko phuv. (Odova hine angleder so o Jehova uništinđa o Sodom hem i Gomora.) 11 O Lot birinđa celo jordansko ravnica hem đelo ko istok. Ađahar odvojinđe pe jekh jekhestar. 12 O Avram živinđa ki hanansko phuv, a o Lot živinđa paše uzo dizja ki jordansko ravnica. Ko krajo phravđa pe šatorija paše uzo Sodom. 13 O manuša ando Sodom hine but lošna hem but grešinđe e Jehovase. 14 Ked o Lot odvojinđa pe ando Avram, o Jehova phenđa e Avramese: „Molinava tut dikh okolo tute ko sever hem ko jug, ko istok hem ko zapad, 15 sose celo akija phuv ka dav tuće hem te ćhavenđe kola ka aven palo tute hem oj zauvek ka ovel tumari.