2. Samuilova

21 Jekhvar ko Davideso vreme trin berš hine bokhalipe. O David rodinđa savet ando Jehova, a o Jehova phenđa lese: „O Saul hem oleso ćher tane kriva aso rat ando Gavaoncija kolen mudarđa.“ 2 Tegani o kralj vićinđa e Gavaoncen te vaćeri olencar. (O Gavaoncija na hine Izraelcija, nego on aćhilje ando Amorejcija. Iako o Izraelcija dinđe sovel so na ka mudaren len, o Saul manglja te mudari len sose naštine te trpini so on živinena maškaro manuša ando Izrael hem Juda.) 3 O David phenđa e Gavaoncenđe: „So te ćerav tumenđe? Sova te ućharav odova greh te šaj te blagoslovinen e Jehovase narodo?“ 4 O Gavaoncija odgovorinđe lese: „Na rodaja ni o srebro ni o zlato te ućhari pe okova so ćerđa o Saul hem oleso ćher, hem nane amen pravo te mudara bilo kas ko Izrael.“ Ked šunđa odova, o David phenđa: „Sa so rodena, ka ćerav.“ 5 A on phenđe e kraljese: „Sebepi so odova manuš manglja te mudari amen, te na ova nigde ko Izrael, hem dikhlja sar te ćerel odova, 6 den ko amare vasta efta olese ćhave te mudara len. Ka umlava olengo telo anglo Jehova ki Gavaja, ki Saulesi diz, kas o Jehova birinđa.“ Tegani, o kralj phenđa: „Ka dav tumen len.“ 7 Ama, o kralj smilujinđa pe upro Jonataneso ćhavo o Mefivostej, e Sauleso unuko. O David ćerđa odova sose ov hem e Sauleso ćhavo o Jonatan dinđe lafi jekh jekhese anglo Jehova. 15 Palem hine maribe maškaro Filistejcija hem Izraelcija. O David đelo pe manušencar te borini pe protiv o Filistejcija. Ko krajo o David but ćhindilo. 16 O Jesvi-Venov, jekh ando Refaimese potomkija, kaso bakarno koplje hine pharo 300 siklija hem kova hine le nevo mač, manglja te mudari e Davide. 17 Ama, e Serujako ćhavo, o Avisaj, đelo te pomožini e Davidese, napadinđa e Filistejine hem mudarđa le. Tegani e Davidese manuša dinđe sovel e Davidese: „Na ka đa više amencar ko maribe, te na mudarđol e Izraelesi svetiljka!“