1. Kraljevima

17 O Ilija, o Tesvićanin, jekh ando manuša kola živinđe ko Galad, phenđa e Ahavese: „Dava sovel upro Jehova, e Izraeleso Devel kase služinava, nekobor berš na ka ovel ni rosa ni boršim, sa đi me na phenava!“ 10 Ov đelo ki Sarepta. Ked alo đi o dizjake udara, dikhlja jekha udovica koja ćedinđa kašta. Vićinđa la hem phenđa laće: „Molinava tut, ana maje hari pani te pijav.“ 11 Ked oj đelji te anel pani, ov phenđa laće: „Molinava tut, ana maje hem hari maro!“ 12 Ko odova, oj phenđa: „Dava sovel upro Jehova, to Devel, nane man maro već samo jekh šaka varo ko ćupo hem hari zejtini ko khoro. Aće, ćedava hari kašta te legarav len ćhere, te ćerav diso hajbase maje hem me ćhavese, hem palo odova te mera.“ 13 Tegani o Ilija phenđa laće: „Ma dara. Đa ćhere hem ćer sar so phenđan. Ama najangleder, kotar odova so isi tut, ćer maje jekh tikni pogača hem ana maje, a palo odova ćer diso tuće hem te ćhavese. 14 Sose ađahar phenela o Jehova, e Izraeleso Devel: ’O varo ko ćupo na ka trošini pe niti o zejtini ko khoro sa đi o dive ked o Jehova ka mukhel o boršim ki phuv.‘ “ 15 Ađahar oj đelji hem ćerđa sar so phenđa o Ilija. Hem but vreme ov, oj hem olaki porodica hine len so te han. 18 Tegani i romni phenđa e Ilijase: „So grešinđum tuće kova služineja e Devlese? Da li tu aljan koro mande te setinćere man ko me grehija hem te mudare me ćhave?“