1. Letopisa

3 Ađahar sa o izraelska starešine alje ko kralj David ko Hevron hem ov olencar ćerđa savez ko Hevron anglo Jehova. Palo odova, pomazinđe e Davide te ovel kralj ko Izrael, sar so phenđa o Jehova prekalo Samuilo. 15 Jekhvar, trin ando trijanda zapovednikija đelje đi i stena hem alje ko David ki jekh pećina ko Odolam, a o Filisteja hine ulogorime ki Refaimsko dolina. 16 O David tegani hine ko than kaj garavđa pe, a i filistejsko vojska hine ko Vitlejem. 17 O David phenđa: „O ked bi šaj te pijav pani ando okova bunari uzo vitlejemska dizjake udara!“ 18 Tegani okola trin đelje ko filistejsko logor, lelje o pani ando vitlejemsko bunari kova tano uzo dizjake udara, hem anđe le e Davidese. Ama o David na manglja te pijel odova pani, već ćhorđa le ki phuv anglo Jehova. 19 Palo odova phenđa: „Niked na bi ćerava diso ađahar, sose darava ando Devel! Sar te pijav o rat ando akala manuša kola rizikujinđe po životi? Sose odoleja so anđe maje odova pani, on rizikujinđe po životi.“ Odolese na manglja te pijel odova pani. Odova ćerđe odola trin zorale ratnikija.