1. Letopisa

17 Ked o David smestinđa pe ko po dvoro, ov phenđa e prorokose e Natanese: „Me živinava ko dvoro andi kedrovina, a o kovčeg ando Jehovaso savez tano talo šatori.“ 2 Tegani o Natan phenđa e Davidese: „Ćer sa odova soj tano tuće ko vilo, sose o pravo Devel tano tuvaja.“ 4 „Đa hem vaćer me slugase e Davidese: ’Ađahar phenela o Jehova: „Na ka ćere maje tu o ćher te živinav ano leste. 7 „Odolese akana ađahar phen me slugase e Davidese: ’Ađahar phenela o Jehova, o Komandanti upro sa o vojske: „Me leljum tut ando pašnjakija, ando stado kova arakhljan, hem ćhivđum tut te ove vođa me narodose e Izraelese. 15 Sa odola lafija hem i vizija o Natan vaćerđa e Davidese. 16 Tegani o kralj David bešlja anglo Jehova hem phenđa: „Devla Jehova, ko hijum me hem koj tani mi porodica te ćere odobor buća maje? 17 Hem samći ked odova nane dovoljno Devla, već tu vaćereja so ka ovel ki budućnost e ćhavencar ando to sluga hem upro mande dikhljan sar upro manuš kas valjani pana pobuter te vazde, Devla Jehova. 18 So šaj pana te phenel tuće to sluga, o David, andi čast koja mothoveja maje, ked tu odobor šukar penđareja te sluga?